Lîderê Partîya La France Insoummise Jean-Luc-Melenchono ke serekkomaro verên ê Fransa yo, keyepelê xo yê blogî de derheqê Qirkerdişê Parisî yê 23yê Kanûne de bi sernameyê 'Na xebera rîpelê hîrêyînî nîya' nuşt.

Melenchonî nuşteyê xo de Qirkerdişê Parisî yê 9ê Çeleyê 2013î zî vist vîrî û vat ke nê qirkerdişî 10 serrî xo pey de verdayî la hema zî qirkerdiş bi temamî nêameyo roşnîkerdene. Melenchonî vat: ''Gelo sirê dewlete çita yo? Eşkera yo ke heta ke bale nêşora serê Tirkîya çîyêk nêno dîyene.''

Melenchonî ard ziwan ke ganî dozgerîya antî-terorî derheqê Qirkerdişê 23yê Kanûne de tehqîqatî bikera. Melenchonî vat: ''Tesaduf nîyo ke kiştox cayêk de ke tede merasîmê yadkerdişê qurbananê Qirkerdişê Parisî yê 9ê Çeleyê 2013î yeno kerdene hêriş kerd. Amadekarîya kiştişê aktîvîstanê cinîyan çîyêko normal nîyo. Qirkerdişê 23yê Kanûne serrgêra 10. ya Qirkerdişê 9ê Çeleyê 2013î de ame kerdene. Kesayetê merdimanê ke kişîyayê, cayo ke ê kişîyayê, mojnenê ke na yew dafik a. La tehqîqatê antî-terorî eşkeno nê çîyan bi zelalî eşkera bikero.

Serekkomar Macronî derheqê hêrişî de vat 'Hêriş vera komelê kurdan ameyo kerdene' û bi nê qiseyî hêriş kerd yew çarçewe.  Ganî 'nîşaneya qelsîye' nêra mojnayene kesêkî. Qetilkerdişê hîrê kurdan xeberêka rîpelê hîrêyînî nîyo. No qirkerdiş hînî teyna meseleya kurdan zî nîyo. No raştîyêka sîyasî ya cidî ya asayîşê zere û teberî ya.''