Sîyasetmedaranê kurdan Musa Çîftçî û Habîp Eksîkî derheqê krîzê koçberan ê serê sînorê Polonya-Belarusî de ANFyî rê qisey kerd û bale ante rewşa sîyasî û rojane ya Başûrî ser.

Musa Çîftçîyîo ke Başûrê Kurdîstanî de maneno ard ziwan ke serebûtê ke wextê DAÎŞî de qewimîyayî bîyî sebebê şiknayîşî, dima zî krîzê referandumî, meseleya meaşan, krîzê sîyasî reyde rewşe bîye giranêr.

Çîftçîyî vat: ''Şarê Başûrî xizan o, sefîl o. Serdestê Başûrî zengîn ê, malan ê mîyanê xo de bare kenê. Şarî bi mengan çalakîyê şermezarkerdişî kerdî. Hêzanê PDKyî bi şîdetî nê çalakîyî vindarnayî, merdiman îşkence dî. Hînî hêvîya merdiman nêmenda. Merdimî tehlukeyanê pîlan gênê xo ver û xîret kenê ke biremê. Na rewşe têna Tirkîya û PDKyî rê fayde kena. Şîyayîşê muxalîfan PDKyî rê fayde keno.''

Wekîlê HDPyî Habîp Eksîkî zî da zanayene ke şerî ra herême de bêçaretîye qewimîyena û vat: ''Îqtîdarê herême kenê ke merdimî bêçaretîye ra erdê xo biteriknê. Herinda ke metod û rayîrê koçberan bêrê ercnayene ganî sebebê koçberîye bêrê ercnayene. Sînorê Polonya-Belarusî de huqûqê koçberîye nêno caardene. Ganî ma meseleyanê koçberan nîqaş bikerê û çareser bikerê.''

Eksîkî îfade kerd ke xîret yeno kerdene ke Kurdîstan bêkurd bêro verdayene û demografîya ci bêra vurnayene. Eksîkî vat: ''Merdimê ke nêeşkenê biciwîyê pa domananê xo welatê xo war verdenê şinê.''