Nê dewirî de ke Rojhelatê Mîyanênî de bi taybetî Sûrîye û Rojawanê Kurdîstanî de serebûtê krîtîkî qewimîyenê Meclîso Federal ê Almanya ewro meymandarîya kombîyayîşêkê girînî bikero. Bînaya "Marîe-Elîsabeth-Luders-Hausî" ya Meclîsê Federalî de bi sernameyê ''Perspektîf û firsendê rojaneyî yê seba çareserîya meseleya kurde ya Rojhelatê Mîyanênî'' konferansêk do bêro kerdene.

Zaf sîyasetmedaran û pisporan reyde Tirkîya û Kurdîstan, Almanya ra zî zaf kesî do tewrê konferansî bibê. Konferans saete 10:00 de dest pêbikero û heta şanî do dewam bikero.

Wekîla Partîya Çepe ya Parlamentoya Federale Hêlîne Sommer û Weqifa Rosa Luksemburg ra Dr. Boris Kanzleiter do destpêkê konferansî de qisey bikerê. Konferans do bi pêşkêşîya Îsmaîl Kupelî ya bi sernameyê ''Semed û Peyê Meseleya Kurdî ya Rojhelatê Mîyanênî'' dest pêbikero.

Dima bi beidarîya Serekwekîla Meclîsê Federalî Claduia Roth, Komîsyonê Têkilîyanê Teberî yê Meclîsê Federalî ra Serekwekîle Dr. Danîela de Ridder û Vervatoxê Têkilîyanê Teberî yê Partîya Çepe ra Stefan Liebich panelêkê bi sernameyê ''Polîtîkaya Almanya û Meseleya Kurdî'' do bêro serûberkerdene. 

Nêmroje ra dima zî panelêkê bi nameyê ''Mabênê Xîretê Xoserîye yê Sernêkewteyî û Otonomîya Herêmîye de Başûrê Kurdîstanî'' do bêro kerdene. Serekwekîlê Meclîsê Herêma Kurdîstanê Federeyî Hemîn Hawramî û Dîrektorê Weqifa Zanistî û Polîtîkayan Prof. Dr. Volker Perthesî sey qiseykerdoxî beşdarê nê panelî do bibê.

Dima bi sernameyê ''Mabênê Îdareyê Xoserî û Restarasyonê Esadî de Rojawan'' panelêko bîn do bêro kerdene. Hemsereka Meclîsê Sûrîyeya Demokratîke (MSD) Îlhame Ehmed û nuştoxe Anîta Starosta zî do panel de qisey bikerê.

Panelo peyên ê bi sernameyê ''Mabênê Teda û Têkoşînê Demokrasîyî de Tirkîyaya Erdoganî'' do bêro kerdene. Hemserekê HDPyî Dr. Mîthat Sîncar, Wekîlê CHPyî Dr. Sezgîn Tanrikulu û Dr. Dîleke Kurban do nê panelî de qisey bikerê.