Komîteya Mende 22-23ê teşrîna verêne de seba nîqaşanê raporî kom bîye û raporê hêriş û tedaya Tirkîya yê vera muxalefetê sîyasî û sivîlî zî rojdemê komîte de bi. Komîte raporê Tirkîya tesdîq kerd. Têna Azerbaycanî rapor tesdîq nêkerd.

Rapor hetê parlamenterê Swêdî Thomas Hammarbeg û Brîtanya ra John Hawellî ra amebi amadekerdene.

Komîteya Mende pare kerd ke Tirkîya pêro cigêrayîş û tehqîqatî parlamenter, parlamenteranê verênan, partîyanê muxalîfan û avûkatan hedef kenê. Rapor de yeno vatene ke îqtîdarê Tirkîya tedaya rojnameger, aktîvîst û komanê bînan kena. Parlamenteran da zanayene ke rewşa xirabe 2019î ra nata nêvurîyaye.

Komîteya Mende eşkera kerd ke operasyonê leşkerî yê teberî yê Tirkîya benê sebebê qesawetan û na babete rapor de do ca bigêra.

Rapor de Komîteya Mende bi taybetî ca da tecrîdê Îmraliyî.  Heyetê Tirkîya xîret kerd ke na made vejo la reyna zî ma made rapor de ca girewt.

MPKE rapor de ard ziwan ke goreyê îdîayan qereqolan û merkezanê destbendkerdişan de îşkence yeno kerdene û ganî selahîyetdarê tirkî cade cewab bidê nê îdîayan.

Rapor de wina ame vatene: ''Meclîs (MPKE) raporê yewînî yê CPTyî ra kêfweş o ke rapor serranê 2017-2019î de ame amadekerdene û tebaxa 2019î de ame eşkerakerdene. Ganî Tirkîya destûr bida ke CPT raporê xo biweşano û pêro pêşnîyazanê derheqê Zîndanê Îmraliyî de ke têkilîyê Birêz Abdullah Ocalan û ê tepişteyan ê bînan teberî ra ameyî birnayene, ca bîyara.''

Rapor de bale ameye antene tepişîyayîşê wekîlan û hemşaredaranê HDPyî û destsernayîşê şaredarîyan ser û wina ame vatene: ''Meclîs sere de tepişîyayîşê Hemşaredarê Qersî, parlamenteranê verênan û endamanê HDPyî tepişîyayîşanê peyênan şermezar keno.''