Roniştişo diyîn ê dawaya PKKyî ya Hamburgî vizêr ame kerdene. Mustafa Çelîkî derheqê şarê kurdî de qisey kerd ke tim raştê qirkerdişan yeno. Çelîkî ard ziwan ke rîyê zextê dewlete ra kurdî ne eşkenê nameyê xo ne zî ziwanê xo bişuxulnê.
Dawaya sîyasetmedarê kurdî Mustafa Çelîkî ya ke roja pancşeme bajarê Hamburgî yê Almanya de ameye destpêkerdene vizêr Mehkemeya Berze ya Herême ya Hamburgî de dewam kerde. Mustafa Çelîko 43 serre sey endamê PKKyî yeno sûcdarkerdene.
Avûkatê Çelîkî Heinz R. Schmittî roniştişê verênî de vatbi ke muwekîlê ci nêweşo girano û gerek hetê heyetê doktoran ra bêro muayenekerdene. Roniştişê diyînî de dadgere Taebnere ard ziwan ke rewşa weşîya Çelîkî ronişitişî asteng nêkeno.
Despêkerdişê ronişitşî de dadgere waşt ke Çelîk xo bido naskerdene. Çelîkî vist vîrî ke o 2016 de ame hukmkerdene û 2 serrî û nîme caze girwete û seba ke ûca xo dayo naskerdene reyna hewce nêkeno. La heyetê mehkeme vat no qîym nêkeno. Dima ra Çelîkî ard ziwan ke o şarê kurdî ra yo ke binê kolonyalîzmê tirkan de yo û bi se serran o ke raştê qirkerdişan yeno. Çelîkî vat: ''Ez bawer kena ke semedê şima fehmkerdiş zehmet o. Kesa/a ke Amerîkaya Başûrî ra eşkena/o mi fehm bikerê la semedê şima zehmet o. Mustafa Çelîk têna darêk de yew pel o. Gerek hîkayeya dare bêro zanayene ke ez bêrê fehmkerdene.''
Çelîkî ard ziwan ke heta ke çew/e tarîxî nêzano, nêeşkeno ewro fehm bikero û dest pê kerd ke sumeran ra nata derheqê tarîxê kurdan de qisey bikero. Dadgere hende vîst deqayan waşt qiseykerdişê Çelîkî bibirne û persayî ke wa qala domanîya xo bikero. Dadgere waşt ke wa Çelîk derheqê qewimîyayîşanê memleketê xo Pali yê Xarpêtî yê 1977î bikero. Çelîkî ard ziwan ke seba ke domanîya mi bêro fehmkerdene gerek şima bizanê pîrika mi çi anto û kerd ser: ''Ez Xarpêt de bîya bîl ke tîya Şêx Sedî û embazê ci înanê ke Serewedaritişê Kurdan ê 1995î da destpêkerdene û Seyîd Riza û embazê ci yê ke rayberê Xoverdayîşê Dêrsimî yê ameyî dardekerdene. Nê qirkerdişî bîyayîşê min a ver bîyî. Pê nê qirkerdişan ame waştene ke kurdî estbîyayîşê xo ra bişarmî û nasnameyê xo caverdê. Ziwan û kulturkê kurdan ame qedexekerdene.''
Roniştişê verênî de dozgerîye çalakîyê demokratîkî sey sûcî ramojnayî bî û îdîa kerd bi Ahmet nameyo kod ê Çelîkî yo. Çelîkî no zî vîst vîrî û vat: ''Nameyê min o raşt Amed o. Seba ke Amed nameyêko kurdkî yo û qedexe yo fermî de sey Mustafa ravêreno. Merdim û embazê mi çirey nêvanê Mustafa. Eke kuçe de yew sey Mustafa veng bikerê mi ez nêewenîyena xo ya pey. Xora Mustafa nameyê Ataturko ke şarê kurdî qir kerd. Dişmen semedê asîmîlekerdişî destûrê nameyanê ma nêdano, nameyanê xo danê ma ke. Na polîtîkaya tirkkerdişî ya ke tim û tim vera kurdan yena rayraberdene.''
Çelîkî wina dewam kerd: ''Ma keye de kurdkî qisey kerdêne. Keyeyê ma de kirdkî/zazakî ameyêne qiseykerdene. Seba ke ma sey domananê kurdan tirkî nêzanyêne dibistan de mehlimê ma ma zaf kiştî. Ez tirkî pê kiştişî musaya. Badê darbeya 1980yî zextê Tirkîya vejîya merhaleya sîstematîke. Şansê mi bibe ke ez têna ameya kuwayane. Dewa de domanî bînî ameyî qetilkerdene. Dima ke ez ameya Almanya mi kirdkî ya xo aver berde û ez kurmanckî mûsaya. Kurdîstan de zextê dişmenî ra ma têna keye de qisey kerdene.''
Çelîkî ard ziwan ke babîyê ey tepişya û raştê îşkenceyî ame û seba ke o zî nêro tepiştene 15 serre ame şawitene Almanya la ey qet nêwaşt Almanya de biciwîyo û rûhê ci çirey tîya nêbi. Çelîkî vat: ''Seba ke ez nêeşkena xerîbê de biciwîyê ke qewimîyayîşanê welatê xo rê dûrî ra seyr bikerî serra 1996î de ez şîya akdemîya PKKyî û nizdê serrêke cayê Rayrberê Şarê Kurdî Abdullah Ocalanî de menda. O wext Kurdîstan de 4 hezar û 800 dewî ameyî vêşnayene û bi hezaran kesî ameyî qetilkerdene. Demo wînayên de ya ez têna semedê xo ciwîyayêne ya da vera tecewuzo ke hetê leşkeranê tirkan ra cinîyanê ma rê bîyêne, rijnayîşê dewan û qetilkerdişê vera şarê xo têkoşîn kerdêne. Mi qerarê têkoşînî girewt. Mi koyê Amedî waştî. Eke ewro ez eynî rojan reyna biciwîyê ez reyna nê qerarî gêna. Ez hîrê serrî koyanê Kurdîstanî de menda. Tebaxa 1999î de gerîla peyser ancîya.''
Çelîkî derheqê rewşa weşîya xo de zî nê vatî: ''Ez 2001î ra nata dej ancena. Nêweşîya kîmura ke zaf tay yena vînayene ez pê kewta. Heta 2008î rîskê mergî bibe nika bîya kronîke. 2018 de verî ke ez zîndanî ra vejî dejê mi zêdîyayî. Goş, Çim, qirrike,Fek, dedanê mi dejenê. Mi hewt aşmî kortîzon şuxulna. Çend hewteyê ke dest û paşnayê mi masenê û dejê mi zaf bîyî xidar.''
Çelîkî vat o 23 saetî huceyê ci de qefilnaye yeno tepiştene ke na zordarîye ya.
Roniştişê Çelîkî 9ê temmuze roja pancşeme saete 11 de do dewam bikero. Nê roniştişî de do şahîdî bêrê goştarîkerdene û raporê tibî bêro eşkerakerdene. Roniştişo bîn zî 10 temmuze de do bêro kerdene dima ra hîrê hewteyî mabên do bêro dayene û 29ê temmuze de bêro dewamkerdene.
