Vervatoxa Têkilîyanê Teberî ya KNKyî û Endama Konseya Rayberdişî Nîlufere Koç derheqê rewşa Sûrîye ya newîye û cayê kurdan de ANFyî rê qisey kerd.

Nîlufere ard ziwan ke rijîyayîşê rejîmê Esadî bi hêrişanê Îsraîlî yê vera Hîzbullahê Lubnanî eleqedar o û vist vîrî ke Esad bi hêzê xo ney, bi hêzê Rûsya û Îranî payan ser de bîyo. Nîlufere vat: ''Bi hêrişanê Îsraîlî Îran qels bi û Rûsya zî bêtesîr mende. Bi nê hawayî rejîmê Esadî rijîya.

20ê çeleyî de serekê Amerîka yo newe Trump do dest pê erkî bikero. Dîzaynê Sûrîye zî do heta 20ê çeleyî temam bibo. Seba ma kurdan çareserîye zelal a. Şarê ma 12 serrî yo bedelê giranî dayî û tim rayîrê çareserîye mojna. Şaran Rojawan de ferasetêko demokratîk pîya na ro. Coka sîstemo ke pêro Sûrîye do bikero verarê xo ame awankerdene.''

Nîlufere pare kerd ke dewleta tirke ameyoxê şaranmê herême rê gefan wanena û vat: ''Dewleta tirke qerqilîyena ke bi dîzaynê neweyî dore do bêra ci. Sey hedefî qalê Îran, Iraq, Sûrîye û Tirkîya yeno kerdene. Iraq û Sûrîye de rejîmê Baasî berteref bîyî û kurdî statu vist destî. Her çiqas warê mîyanneteweyîyî de seba kurdan sempatî est a zî hêzê mîyanneteweyîyî rewşa jeopolîtîke ya Tirkîya ra verê hêrişanê serê kurdan de bêveng ê. La xoverdayîşê kurdan rixmê ney zî nêno şiknayene. Şarî Rojawan nêterikna û xoverdayîşî ra fek vera nêda.''

Nîlufere hêrişê dewleta tirke ya îşxalkere û cerganê Artêşa Milî ya Sûrîye (SMO) şirove kerdî û vat ke cergê HTŞyî sey DAÎŞî têgêrenê û dewleta tirke kena ke raştîyan binimna. Nilufere vat: ''Şar bi xurtî vera cerganê SMOyî xo  ver dano.

Rewşa hêrişanê vera Minbicî manena rewşa Kobanê ya 2014î. Seba ke refleksê komelkî nêvejîyê werte manîpulasyonî yenê kerdene. Tay dewletî nameyê kurdan ser o qisey kenê. Ganî ma paştîya xo nêdê qet yew dewlete. Xora Rojawan wayîrê kanalanê dîplomatîkan o. La oyo ke do ma bixelisno yewîya neteweyî ya. Ganî ma naye ser o kom bibê û sey prosesê Kobanê têbigêrê. Kobanê de ruhê yewîya neteweyîye ame afernayene coka her kesî xo nêzdîyê ma kerd. 

Nika dîzayno se serrî yeno kerdene, bazarîyê pîlî est ê. Coka ganî ma hêzê xo yê komelkîyî ra ber ganî paştî nêdê hêzêkê bînî. 

Ma se serrî yo yenê birîndarkerdene. La 50 serrî yo tarîx vurîyeno. Ma vurîyayê, bîyê xurtêr. Hêzê ma yê xopawitişî û rêxistinîya ma est ê. Erdogan hema zî wazeno ke Kobanê de nimaj bikero. Coka do hêrişê Kobanê bikero. Ganî ma vera ney wurzê we. Ganî ma vera hêrişanê îşxal û qirkerdişî têbigêrê.''