Bajarê Strasbourgî yê Fransa de seba ke Nobeta Azadîye kewte serra 10. serkêşîya KDCK-E de çalakîye ameye kerdene. Rayraşîyayîş û mîtîng de tecrîdê serê Rayberê Şarê Kurdî Abdullah Ocalanî ame şermezarkerdene û azadîya ci ameye waştene.

Reyna de hêrişê îşxalî yê vera Başûrê Kurdîstanî zî ameyî şermezarkerdene û bale ameye antene muhîmîya yewîya kurdan ser.

Rayraşîyayîş de derheqê tecrîd û felsefeya Abdullah Ocalanî de vilawekî ameyî wendene û vilakerdene. Qiseykerdişan de ame vatene ke tecrîdê serê Ocalanî û hêrişê îşxalî parelel yenê domnayene. Çalakwanan vat ê do tim vera tecrîd û polîtîkaya qirkerdiş û îşxalî payan ser bê.

Badê rayraşîyayîşî verê Konseya Ewropa de çalakîya roniştişî ameye kerdene. Qiseykerdişan de tecrîd sey dewamê Komployê Mîyanneteweyî ame hesibnayene û sere de CPT veng dîya dezgehanê Ewropa ke wa wezîfeyê xo bikerê.

Çalakîya roniştişî ra dima çalakwanî bi sloganan ver bi cayê Nobeta Azadîye rayra şîyî û badê rayraşîyîşî mîtîngêk ame kerdene. Tîya temsîlkaranê dezgehan ke qisey kerd tecrîd sey sûcê merdimîye name kerd. Badê qiseykerdişan temsîlkaranê dezgehan Nobeta Azadîye grûba Oldenburgî ra dewr girewte.