Nobeta Azadîye ya ke pê şîarê 'Rayberê Şarê Kurdî Abdullah Ocalanî rê Azadîye' verê bînaya Konseya Ewropa de yena kerdene hewteyê 416. de ya. Çalakîye çarçewa tedbîranê vera vîrusê Korona de 11ê adare de mabên amebi dayene çalakîye. Çalakîya nê hewteyî pê beşdarîya endamanê Cinîyan ê Ciwanan ê Azadan (JCA) û Têgêrayîşê Ciwanan ê Şorişgêran (TCŞ)newe ra dest pêkerd. 

Koma çalakîye ciwananê kurdan ê bi nameyê Jîyan Aslan, Mervan Ahmed, Raman Bîlal û Aram Semsûrî ra yena meydan.

Ciwanan derheqê çalakîye de eşkerayîye daye û pare kerd ke çalakîya ke do bikewa serra 9. asta stratejîke de girîng a.

Komîteya Amadekare ya Çalakîya Nobete Zulfu Bîngolî zî îfade kerd ke şarê kurdî 8 serran ra nata bi hawayêkê fedakarî wayîrê çalakîya nobete vejîyeno û nika ra pey zî çalakîye do pê heman qerardarî dewam bikera.

Nobeta Azadîye 25ê hezîrana 2012î de herême de ke tede Konseya Ewropa, Komîteya Vergirewtişê Îşkenceyî û Mehkemeya Heqanê Merdiman ê Ewropa estê, dest pêkerdbî. Her hewte komêka kurdan çalakîye kena. Hewteyê bînî zî Têgêrayîşê Cinîyan ê Kurdan ê Ewropa (TJK-E) do beşdarê çalakîye bibo.

Çarçewa çalakîye de heta nika se hezaran kesan reyde derheqê fikranê Ocalanî de xoşebere ameye kerdene. Mabênê serranê 2014-2015î de zî pê waştişê azadîya Ocalanî çarçewa kampanyaya îmzayan  de bi des mîlyonan  îmzayî ameybî arêdayene.