Nobeta Azadîye ya ke 25ê hezîrana 2012î de bajarê Strasbourgî yê Fransa de semedê azadîya fîzîkîye ya Rayberê Şarê Kurdî Abdullah Ocalanî dîyaye destpêkerdene  serra 10. de dewam kena.

Çalakwanê ke hewteyê 471. de çalakîye domnene vera tecrîd, îşxal û qirkerdişî  semedê yewîya neteweyîye veng da.

Nobeta Azadîye hewteyo verên ê serra 10. de hetê temsîlkaranê bawerî, aktîvîstanê TJK-E û hemserekanê merkezanê komelê demokratîkî yê kurdan yê ke pabesteyê KCDK-E yê ra yena rayaraberdene.

Eşkerayîya ke çalakîye de ameye dayene de bale ameye nînan ser antene: ''Yew netewe bi têkoşînê azadîye beno netewe. Binê her şertan de ganî azadîye, edalet, demokrasî û seyyewbînîye semedê pêro kesan bêrê pawitene.  Rojhelatê Mîyanênî û Tirkîya de vera şarê kurdî û Rayberê ci her tewir caardişê teberê merdimîye kewtî dewre. Hukmato faşîst ê AKP-MHPyî serkêşîya hêrişê vera kurdan keno. Hêzê hegemanîkî yê ke cuya hempare ya şaran nêwazenê yê zî paştî danê ci. Şarê kurdî qirkerdişî rê  rî bi rî yo. Vera dewleta tirke ya îşxalkere kurdî mecburê ke pîya têkoşîn bikerê. Wa hinî peynîye tecrîd û îşkenceyî bêro, Abdullah Ocalan  bibo azad û Kurdîstan bibo wayîrê statuyî.''