Nobeta Seba Ocalanî Azadîye 8 serrê xo qedînayî

Nobeta Seba Ocalanî Azadîye ya Strasbourgî 8 serrê xo qedînayî. Çalakîkeran pare kerd ke heta ke azadîya Rayberê Şarê Kurdî Abdullah Ocalanî û Kurdîstanî bêra caardene, ê do xo ver bidê.

Nobeta Seba Ocalanî Azadîye ya ke şaristanê Strasbourgî de yena kerdene 8 serrê xo qedînayî. Şaristanê Strasbourgî de dezgehê sey Konseya Ewropa, Komîteya Vergirewtişê Îşkenceyî, Mehkemeya Heqanê Merdiman a Ewropa û Parlamentoya Ewropa. Çalakîya nobete bêmabên dewam kena. Hewteyê 416. de dezgehê KCDK-E nobete dewir girewte û nawnayîşêlê pîlî kerd.

Hemsereka KCDK-E Fatoşe Goksungur pare kerd ke Ocalan 22 serrî yo ke binê tecrîdêkê giranî de yo û vat: ''Pê komploya mîyanneteweyîye wazenê îradeyê kurdan ê azadan werte ra wedarê. '' Fatoşe bale ante ser ke dewleta tirke ya îşxalkere verê çimanê dinya de kurdan qir kena û hêzê mîyanneteweyî zî benê hemkarê nê hêrişan.

Çalakîkera TJK-E Nezahate Erguneş zî vat: ''Ocalan teorîsyenê têkoşînê cinîyan ê kurdan ê azadan o û ey cinîyan ê koleyan ra cinîyê azadî afernayî.''

Endamê Dîwanê KCDK-E Demîr Çelîkî îfade kerd ke dewleta tirke Başûrê Kurdîstanî de qirkerdiş û qetlîaman kena û seba yewîya neteweyîye veng da.

Nameyê Komelê Îslamî yê Kurdîstanî ser o Mala Mihedîn zî vat: ''Kesê ke vera nê zulman bêveng manenê hemkarê nê sûcan ê.''

Hemserekê Meclîsê Diaspora yê Şingalî Fîkret Îgrekî vat: ''Dewleta tirke tewr peyên hêrişê Mexmûr, Şingal, Herêmanê Pawtişî yê Medya ser o bombayî varnayî û dima zî Kobanê de SÎHAyan 3 cinîyê sivîlî qetil kerdî. Dewleta tirke qesasê DAÎŞî gêna.''

Nameyê TEV-ÇANDî ser o Hozan Şemdînî ard ziwan ke Ocalan pê îdeolojî û paradîgmaya xo têna rayberê kurdan nê, rayberê pêro Rojhelatê Mîyanênî yo. Şemdînî vat: ''Heta ke Rayberîye azad nêba çalakî û têkoşînê ma do dewam bikerê.''