Komîsyonê Tehqîqatî yê Sûrîye yê Neteweyanê Yewbîyayeyan (NY) bi kombîyayîşêkê çapemenîye Cenevre de raporê xo yê Sûrîye yê 1ê çeleyî-30ê hezîrana 2023yî eşkera kerd. 

Serekê Komîsyonî Paolo Pinherioyî kombîyayîş de qisey kerd û bale ante ser ke Sûrîye de şîdet zêdîyeno û ekonomî bena xirabêr. Pinheiroyî vat: ''Terefê şerî sivîlan remnenê, îşkenceyê înan kenê û kişenê.''

Pinheiroyî qala zîndananê DAÎŞî zî kerde û venga pêro dewletan da ke hemwelatîyanê xo yê endamanê DAÎŞî Rojawanî ra bigêrê û muhakeme bikerê.

Rapor de bale ameye antene pêkewtişanê mabênê dewleta tirke û QSDyî ser û ame vatene ke hêrişanê dewleta tirke de sivîlî kişîyenê.

Rapor de dîya zanayene ke herêmanê îşxalkerdeyan de Artêşa Milî ya Sûrîye (SMO) û hêzê ci vera kurdan sûcanê şerî kenê.

Reyna rapor de ame îfadekerdene ke kurdî bi îdîaya ke pabesteyê Îdareyê Xoserî yê yenê destbendkerdene, îşkence vînenê û wareyanê xo ra yenê dûrîvistene. Rapor de ame parekerdene ke Serêkanîyê û Girê Sipî de selahîyetdar û leşkerê dewleta tirke bi xedarî îşkenceyê kurdan kenê.

Rapor de venga dewleta tirke ame dayene ke wa goreyê huqûqê mîyanneteweyî têbigêra û sûcanê xo yê vera merdimatîye ra fek vera bida.