Wekîlê Partîya Karkeran a Sosyal Demokrate Anders Ostenburgî derheqê kişîyayîşê Olof Palmeyî de cewabî dayî persanê ma û îfade kerd ke dewaya Palmeyî qedîyaye.

Osterbergî pare kerd ke dima ke Palme kişîyayîşî kurdî bi hawayêkê giranî ameyî sûcdarkerdene û bi taybetî Swêd de kurdî maruzê şîdet û tacîzê polîsana meyî. 

Osterbergî vat: ''Birînê tay kurdan derman bîyî la birînê tay kurdan zî hema zî dejenê. Ganî nê birînî bêrê dermankerdene. Ganî hukmatê Swêdî kurdan ra uzrê xo biwazo. Ma seba nîqaşan amade yê.''

Ma Osterburgî rê persa ke o do bi vernîyazêkê persî mesele do bero Meclîs yan ney. Osterbergî vat:'' Ganî ma dîasporaya kurdan a Swêdî reyde qisey bikerê. Rayîro tewr hol ê pêkerdişan zî nîqaş o. Ganî kurdî bi hawayêkê hîrayî serebûtê ê wextî bikerê rojdem. Çunke derheqê babete de zanayîşê zêdêrî zî çin ê. Ganî Swêd her çî ra verî raştîyanê tarîxîyan ser o vindero.''

Hetê bînî ra selahîyetdaranê HDPyî Parlamentoya Swêdî de Komîsyonê Polîtîkaya Teberî û pêro temsîlkaranê partîyan ê sîyasîyan reyde û parlemanetaranê endamanê Komîteya Paştdayîşê Şarê Kurdî reyde bi telefonî qisey kerd. Andres Osterbergî vat ke kombîyayîşê telefonî de înan hêrişê dewleta tirke yê vera Vakurî ercnayî.

Osterbergî ard ziwan ke hetê heqanê merdiman û hûrmetê bi erjanê demokrasîyî ra Tirkîya de averşîyayîşî benê û vat: ''Ma tim dostanê xo yê HDPyîjan reyde têkilî de yê.''

Osterburgî eşkera kerd ke ê do paştdayîşê xo yê seba HDPyî xurtêr bikerê.