Ronayoxanê PKKyî ra Sakine Cansiz, Temsîlkara KNKyî ya Parisî Fîdane Dogan û Endama Têgêrayîşê Ciwanîye Leyla Şaylemez serrgêra 7. ya şehadetê înan de ameyî vîrardene. Hetê Têgêrayîşê Cinîyan ê Kurdan ê Ewropa (TJK-E) CDK-Fyî  ra Paris de rayraşîyayîşêk û mîtîngêk ameyî organîzekerdene. Almanya, Fransa, Swîsre, Hollanda û Belçîka ra bi hezaran kesî tewrê ci bîyî.

Endama Konseya Serekîye ya Pêroyî ya KCK’yî Sozdar Avesta zî mesajêko  bidîmen şawit çalakîya Parisi. Avesta vat: ‘‘Wayîrvejîyayîşê xeta Sarayan pawitişê şorişî û afernayîşê komelêkê azadî wezîfeyê cinîyan o‘‘

Badê saetêk rayraşîyayîşo ke bi sloganan dewleta tirke û  bêvengîya hukmate Fransa ameyî şermezarkerdene mîtîngêk ame viraştene.

Qiseykerdişê akerdişî hemserekanê CDK-Fyî Remziye Demirci û Lokman Kanarî kerd. Hemserekan vat şarê kurdî na bêhuqûqîye qebûl nêkeno  û Fransa ra wazeno ke wa nê qirkerdişî eşkera bikero.

Bi nameyê TJK-E Yildize Filimcî ya ke vera hêrişê dewleta tirke yê vera kurdan hêrsê xo ard ziwan waşte Fransa berpirsîyarîya xo bica bîyaro.

Babîyê Fîdane Dogan Hasan Dogan zî vat ez babîyê Rojbîne, hemrayê Sakîne û apê Leyla ya. Serra 7. de ez qirkerdişî şermezar kena. Ma sey kurdan destê yew bînan bîgêrê gamêke bierzê û Rayberê xo Ocalanî zîndan ra vejê.

Babîye Leyla Şaylemez Cumalî Şaylemezî vat her çika zerîya ma bivêşe zî sereyê ma bi şehîdanê ma berz o. Ê nêmerdî zerîya şarê kurdî de ciwîyenê.

Hemserekê  KONGRA-GELî Remzi Kartalî Sara Rojbîn û Ronahî sey rayberê şarê kurdî name kerdî û vat heta ke heqîqetê înan vejîyo werte do no xoverdayîş dewam bikero. Mesajê ma zelal o ma do emser heme waran de têkoşînî xurt bikerê heta azadkerişê Rayber Apo û Kurdîstanî vindertişê çîn o.

Bi nameyê Têgêrayîşê Milçewtnêkerdeyan Matilda Panot zî vat 7 serrî ravêrtî hema Fransa qirkerdiş zelal nêkerd no semedê înan eybêko gird o.

Eva Sas a ke bi nameyê Keskan qisey kerd ard ziwan ke ê cayê kurdan de yê û vat ma dezgehanê eleqedaran ê Fransa ra waşt ke gamêke bierze. Yeno vatene înan de cipersayîş dayo destpêkerdene. Na gamêk a û ganî bêra girdekerdene.

Bi nameyê Antî Kapîtalîstan Oliver Besanconetî bale ante ke kurdan semedê demokrasî û azadîye bedelê girdî dayî û vat semedê caardişê edaletî tewr vernî de ganî PKKyo ke Sakîne Cansiz ronayoxê ci ya lîsteyê terorî ra bêro vetene.

Mîtîng bi deyîranê Hozan Comerd, Farqîn Azad, Dîyar Mahrovî û Menalî qedîya.