Parlamentoyê Ewropa ê Strasbourgî de vizêr saetanê şanî de bi sernameyê “Hêrişê hewayî yê dewleta tirke yê vera Rojawanî” roniştiş ame kerdene. 18 parlamenter û serekanê grûban qisey kerd.

Qiseykerdişan de ame vengdayene ke wa hêrişê dewleta tirke yê vera Rojawanî cade bêrê vindarnayene.  Parlamenteran waşt wa warê havayî zî bêro qefilnayene. Bitaybetî ame waştene ke wa şuxulnayîşê çekanê kîmyewîyan bêro cigêrayene.

François Alfonsi (Greens/EFA-Fransa):  Erdogan semedê îşxalê herême huqûqê mîyanneteweyîyî binpay keno.  Sîvîlî yenê qetilkerdene, kurdî ûca demokrasîya raşte rayra benê. Nê hêrişî vera nê sîstemî û heme dinya tehdîdêk o.

Ozleme Demirel (GUE/NGL-Almanya): Almanya de domanî pê keyfê xo ciwîyenî la Rojawan û Sûrîye de domanî her roje dej ancenê. Çunke rejîmê Erdoganî hêrişê kudan keno û qirkerdişan keno. Ma vera nê vejîyenê, ganî Yewîya Ewropa zî vera ci vejîyo.

Maria Isabel Coelho Santos (Partîya Sosyalîste-Portekiz):  Erdogan seba ke vîjnayîş de ser bikewo, hêrişê kurdan keno. Hêrişê Rojawanê Kurdîstanî keno. Ma eşkera vajê ke nê hêrişî vera şarî yenê kerdene.  Ganî heme welatê endamê  Yewîya Ewropa vera  nê hêrişan vengê xo vejê. Ganî Neteweyê Yewbîyayeyan cade koridor abikero û hetkarîya merdimîye biresno ûca.

Katrine Langensiepen (Green/EFA-Almanya):  Kurdan vera terorî şer kerd û inkey a herême binê tehlukeyî de ya. No yeno no mana ; ma zî binê tehluleyî de yê. Ganî Erdogan cade bombardumanê vera Rojawanî vindarno. Herême de asayîş çîn o, ma de zî bine asayîşî de nîyê.

Antoni Comin i Oliveres (Parlamentero Xoser-Katalonya): Tirkîya semedê Yewîya Ewropa bîya yew tehdit. Hêrişê Kurdîstanê Rojawanî kena. Kobanê de nêweşxaneyê domanan da bombayan ver. Problemê ma yê zaf girdî bi Tirkîya est ê. Kam ke Tirkîya paweno ganî ma fam bikerê. Ganî ma bipersê qey ewro birêz Borell tîya nîyo.
Domènec Ruiz Devesa (S&D-İspanya):  Dewleta tirke roja verêne hêrişê herême nêkena û huqûqê mîyanneteweyîyî binpay nêkena. Ganî ma se kenê bikerê çekanê kîmyewîyan ê ke dewleta tirke şuxulnena bidê cigêrayene.

Evine İncir (S&D-İsveç):  Hema ke semedê her çîyî zaf erey nêbîyo ganî cade warê hewayî semedê Rojawanî bêro qefilnayene.  Ganî cade hêrişê dewleta tirke yê vera kurdan bêrê vindarneyene.

Andreas Schieder (Partîya Sosyalîste ya Ewropa-Avusturya): Ganî ma cade bi tewirkê duristî vera hêrişanê Tirkîya têbigêrê û verê nê hêrişan bigêrê. Ganî warê hewayî bêro qefilnayene û semedê vindarnayîşê nê hêrişan roniştişêk bêro kerdene.