Vera hêrişê îşxalî yê dewleta tirke yê vera Vakur û Rojhelatê Sûrîye nêrazîbîyayîşê rayaumûmîya mîyanneteweyî dewam keno. Parlamenteranê Parlamentoyê Federalî yê Swîsre yê Partîya Sosyalîste (SP) Fabian Molina, Cludia Friedl û Tamara Funiciello vernîyazêkê persî pêşkêşê Konseya Federale kerd. Vernîyazê persî de vera îşxalê dewleta tirke yê serê Vakur û Rojhelatê Sûrîye nêrazîbîyayîş ame mojnayene.

Parlamentera Federale Claudia Friedl vernîyaz de îfade kerd ke dewleta tirke bi îşxalê erdê Vakur û Rojhelatê Sûrîye demografîyê herême vurna. Friedle hêrişê dewleta tirke zî şermezar kerdî û vat ke ganî vera nê hêrişan hîna zêde tewir bêro mojnayene.

Parlamentere Friedle persê xo bi nê hawayî pêşkêşe konseye kerd:

"Konseya Federale çarçewa huqûqê mîyanneteweyî de bi çi hawayî planê 'herêma biasayîşî' yê dewleta tirke rê ewneno ke wazena Vakurê Sûrîye de awan bika?

Dewleta tirke û hêzanê aye yê çekdaran heta nika çend hezar merdimî warê xo ra kerdî?

Konseya Federale herême ra koçkerdişê merdiman û herinda înan de cakerdişê merdimanê cîyayan rê senî ewnîyena? Konseya Federal vera neye do se bika?"

Molina: Peymana Bazirganîya Serbeste Ganî Bêra Batalkerdene

Parlamenterê Federalî û endamê Komîsyonê Têkilîyanê Teberî Fabian Molinayî ard ziwan ke dewleta tirke huqûqê mîyanneteweyî binpay kerd coka waşt ke peymana bazirganîya serbeste bêra batalkerdene.

Molinayî zî Konseya Federale ra persa ke na peymana bazirganîya serbeste ya ke yena plankerdene ke Tirkîya reyde newe ra bêra îmzakerdene do bêra batalkerdene yan ney?

Parlamentere Tamara Funiciello zî rewşa camîyanê Swîsî persaye:

Konseya Federale zanena Swîsî de çend heb camîyî estê ke hetê Dîyanetî ra yenê fînanskerdene?

Swîs de çend camîyî bi fetwayanê Erdoganî xebitîyenî?"