Parlamentoya Swêdî de qala destsernayîşê AKP-MHPyî yê şaristananê Kurdîstanî ameye kerdene.

Wekîla verêne ya HDPyî û Hemşaredara Wanî Bedîa Ozgokçe zî tewra semînere bîye ke Ozgokçe hetê AKPyî ra wezîfeyê xo ra amebî girewtene. Akademîsyenê Zanîngehê Bremenî Çetîn Gurer zî bi Skype tewrê semînerî bi.

Gurer: Pêro îdîayî pûç ê

Gurerî da zanayene ke dest nayîya 32 şaredarîyanê HDPyî ser û 23 hemşaredarî wezîfe ra ameyî dûrvistene. Gurerî vat: ''Wezaretê Karanê Zereyî qet nêeşkeno nê îdîayan îsbat bikerê. Qeyûmî vera erjanê kultur û tarîxê kurdan ê. Tabelayanê kurdkî anê war, Vîrdarîya Roboskî ame rijnayene. Seba çareserîya demokratîke ya dewaya kurdan ganî polîtîkayê Erdoganî bêrê vindartene.

Hemşaredara Wanî Bedîa Ozgokçe zî vat: ''Erdojan rejîmêko dîktatorîye awan kerd û HDP bi îdîaya terorî sucdar keno. Heqê kurdan yenê binpaykerdene. Ma se ra 70-80 rayî girewtî la hurmetê îradeyê şarî nêkenê.

Hemraportorê Tirkîya yê Komîsyonê Kontrolkerdişê Kongreya Îdarekaran a Herêmîye yê Ewropa Yoomi Renstromî vat: ''Hemşaredarê ke wezîfe ra ameyî girewtene sucêk nêkerd la reyna zî tehqîqatê înan dewam kenê. Tewrbîyayîşê cenazaya endamanê PKKyî û qiseykerdişê kombîyayîşî sey terefgîrîya rêxistine yenê şîrovekerdene.''