Parlamentoyê Ewropa de Konferansê Kurdan ê 17ine ame organîzekerdene. Konferanso ke her serre hetê Komîsyonê Hemwelatîyan ê Yewîya Ewropa-Tirkîya (EUTCC) ra organîzekerdene, emser bi sernameyê ''Yewîya Ewropa, Tirkîya, Rojhelatê Mîyanênî û Kurdî'' yeno kerdene. Rayberê dînî yê Afrîkaya Başûre û wayîrê Xelata Azadîye ya Nobelî Desmond Tutu, pawitoxa heqanê merdiman a îranije Şîrîne Ebadî, Temsîlkara Haştîye ya Konseya Ewropa Bianca Jagger, ziwannas û fîlozof Noam Chomsky û wayîra xelata Sakharovî sîyasetmedara kurde Leyla Zana pawitoxîya konferansî kenê.

Konferans de semedê kesanê ke erdlerzê 6ê sibate de dinayaya xo bedilnaye rêz ame girewtene.

Endamê Îtîfaqê Azadî yê Hewzan/Ewropa fransayij François Alfonsî bale ante hêrişê îşxalî yê dewleta tirke yê vera Kurdîstanî ser û vat herra kurdan de rewşe zaf xirab a.

Endama Heyetê Rayberdişî yê EUTCCyî Dr. Dersime Dagdelen zî erdlerzê 6ê sibate ard vîrî û vat beno ke no erdlerz peynîya Erdoganî bîyaro. Dagdelene  bale ante hêrişanê vera Rojawanî ser û vat dewleta tirke tim huqûqê mîyanneteweyî binpay kena. Degdelene vîst vîrî ke wextê erlerzî de zî Tirkîya herême kurdan dayî bombayan ver û vera bêvengîya mîyanneteweyî nêrazîbîyayîş mojna. Dagdelene ard ziwan ke kurdî Ewropa de zî yenê kiştene û hîrê aktîvîstê kurdê ke Paris de ameyî qetilkerdene ardî vîr. Dersime Dagdelen vat: ''Semedê demokrasîyê Rojhelatê Mîyanênî gerek PKK lîsteya Terorî ra bêro vetene. Wayîrê Jin Jiyan Azadî nêeşkenê bêrê krîmînalîzekerdene.''

Avûkata heqanê merdiman a iranije Şîrîne Ebadî zî bi mesajê vîdeoyî tewrê konferansî bîye.

Hemsereka Yewîya Huqûqnasan ê Ewropayijan yê Semedê Dinya de Demokrasî û Heqê Merdiman (ELDH) Barbara Spinelli zî waşt wa tecrîdê serê Rayberê Şarê Kurdî Abdullah Ocalanî bêro wedaritene û vat gerek CPT raporê xo eşkera bikero û tedbîrî bêrê grewtene.

Avûkatanê Abdullah Ocalanî ra Razîye Ozturk zî vist vîrî ke xoverdayîşo ke hetê Abdullah Ocalanî ra dîya destpêkerdene ewro bi Jin Jiyan Azadî dewam keno û vat: ''Gama ke babete bena Abdullah Ocalan Ewopa huqûqê xo bipay kena. Dezgehê mîyanneteweyî vera tecrîdê Îmraliyî goreyê huqûqî tênêgenê.''

Wekîla HDPyî  Merale Daniş Beştaş zî averşîyayîşê aktuelî girewtî dest. Beştaşe vat: ''Eke tedbîrî biameyêne giretene erdlerz de hendê kesî nêmerdêne. Erdoganî her caye dinya de vera kurdan şer dayo destpêkerdene la kurdî çirey têkoşînê xo ra peyser game nêerzene. Ma sey HDPyî do qederê nê vîjnayîşî bewlî bikerê.''

Şubeyê ÎHDyî yê Amedî ra Rehşane Bataray zî vat îqtîdarê Rewşa Îstîsnayî îlan kerd ke wa îxmalanê xo binimno.

Konferansê ke 8ê adare de dest pêkerd do ewro zî bi babetanê cîya cîyayan dewam bikero.