Rêzê konferansanê ''Vera Modernîteya Kapîtalîste Vejîyayîş'' 2012, 2015 û 2017 de Zanîngehê Hamburgî de dîyayî û goreyê planî zî emser 7-9ê nîsana 2023yî de bi sernameyê ''Ma Dinyaya Xo Apey Wazenê'' do biameyêne kerdene. La konferans bi xîretê îstîxbaratê Almanya hetê Rektorê Zanîngehê Hamburgî Prof. Dr. Hauke Heekeren ra ame astengkerdene. Konferans hetê Komîteya Wendekaran (AStA), Torra Cigêrayîşê Alternatîfî û Înîsîyatîfê 'Kurdîstanî rê Haştîye, Ocalanî rê Azadîye' ra ameyêne serûberkerdene.

Seba ke qedexe bêro wedaritene hetê akademîsyen û zanyaran ra kampanyaya îmzayan yena kerdene. Hetê bînî ra Hemserekanê Grûba Partîya Çepe ya Meclîsê Eyaletê Hamburgî Cansuye Ozdemîr û Sabine Boeddinghaus mektubêke şawite Rektorê Zanîngehê Hamburgî û tede waşt ke wa qedexeyê vera konferansê ''Ma Dinyaya Xo Apey Wazenê'' wedarno.

Hemserekan mektube de ard ziwan ke ê bi na bira qedexeyî qerqilîyenê û bale ante girîngîya konferansî ser. Hemserekan Şaredarê Hamburgî Peter Tschentscher û Hetkara ci Katharina Fegebank rê zî mektubêke şawite û waşt ke ê seba wedaritişê qedexeyî bikewê dewre.

Hetê bînî ra goreyê eşkerayîya Torra Cigêrayîşê Alternatîfî rixmê qedexeyê Rektorîya Hamburgî zî konferans tarîxê xo de la salona rêxistina bi nameyê Burgerhaus Wilhelmsburgî de do bêro kerdene.

Kesê ke wazenê eşkenê nê lînkî ra xo biresnê agahîyanê serê adres û bernameyê konferansî: https://www.networkaq.net/de