Endamanê verênan ê Parlamentoyê Ewropa ra Julie Ward, Zanîngehê Westminsterî Prof. Radha D'Souza, Sereka Komîsyonê Hemwelatîyan ê Yewîya Ewropa-Tirkîya (EUTCC) Kariane Westrheim û Koordînatora Kolektîfê Paştdayîşê Kurdan Fazela Mohamed derheqê tecrîdkerdişê Rayberê Şarê Kurdî Abdullah Ocalanî de qisey kerd.

Julie Ward ard ziwan ke wextê wekîlîya xo de a seba azadîya Ocalanî bêmabên xebitîyaye û hema zî karanê dîplomatîkan kena û pare kerd ke seba ney çend reyî pêvînayîşê CPTyî kerd. Warde vat: ''Ma hol zanenê ke normê mîyanneteweyî bi her hawayî nêameyî caardene. Seba haştîye, azadîya Ocalanî zaf girîng a. Ganî ma ney vajê. Tecrîdkerdişê Ocalanî nêno qebulkerdene. Ganî ma seba azadîya ey têkoşîn bikerê, qisey bikerê û vengê xo berz bikerê.''

Radha D'Souza da zanayene ke caardişê azadîya Ocalanî seba înan karo verên o û vat: ''Kurdan bi welat û herêmanê bînan paştdayîşêko hempar kerd û serkewtişê pîlî afernayî. Xêrê kurdan ra Afrîkaya Başûrî ra heta Hîndîstanî, Filîpînan ra heta bi Ewropa paştî dîyena şarê kurdî.''

Sereka EUTCCyî Kariane Westrheim vat: ''Abdullah Ocalan yeno manaya haştîye. Organîzasyonê mîyanneteweyî û rayaumûmîya mîyanneteweyîye hînî nêeşkenê kurdan peygoş bikerê. Kurdî hînî zaf xurt ê û eşkenê estbîyayîşê xo bimojnê. Zaf girîng o ke ma na çarçewe de têbigêrê.''

Fazela Mohomed vat: ''Ma dewleta tirke rê wazenê ke seba pêvînayîşanê haştîye yê bi Ocalanî, amadekarî bikera û atmosferêkê bawerîye biaferna. Qet yew têkoşîn bê paştdayîş do ser nêkewo. Vera rejîmanê zorbazan ê sey Tirkîya ganî ma bimojnê dinya ke hetê kurdan de yê.''