Dezgehê îxtîxbaratê zereyî yê Almanya Rêxistina Pawitişê Destûrî raporê 2019î de eşkera kerd ke sîyasetê krîmînalîzekerdişê dezgehanê kurdan dewam kerd. Rêxistine paştdayîşê aktîvîstan ê almanan ê seba kurdan kerd hedef û vat: ''Almanya hedefê MÎTî de ya.
Dezgehê îstîxbaratê zereyî yê Almanya Rêxistina Pawitişê Destûrî raporê 2019î paytextê Almanya Berlin de vizêr pê eşkerayîyêka çapemenîye eşkera kerde. Serekê Rêxistine Thomas Haldenwangî û Wezîrê Karanê Zereyî Horst Seeheferî zî tewrê eşkerayîye bîyî. Rapor de 13 rîpelî derheqê PKKyî de bîyî.
Rapor de ame vatene ke PKKyî sey serranê bînan hêzê xo pawit û hûmara endam û terefgîrê PKKyî 14.500 a. Rapor de bale ameye antene hêrişê dewleta tirke yê vera Rojawanî ser zî. Îstîxbaratî da zanayene ke îşxalê dewleta tirke yê vera Rojawanî ra dima paştdayîşê aktîvîst û şorişgêranê Almanya yê seba kurdan zêdîya.
Rapor de ame vatene ke hêrişanê dewleta tirke yê vera Rojawanî ra dima Almanya ra tewrbîyayîşê PKKyî zêdîya. Rapor de ame eşkerakerdene ke çalakîyê Almanya û tewrbîyayîşê PKKyî de tecrîdê vera Rayberê Şarê Kurdî Abdullah Ocalanî wayîrê faktorêkê girîngî yê. Rapor de ame vatene ke tay reyan komanê nîjadperestan ê tirkan hêrişê çalakîyanê kurdan kerd. Raporê emserênî de reyna medyaya kurdan zî ameye hedefkerdene.
Hetê bînî ra rapor de bale ameye antene ser ke MÎT Almanya de zanayîşan arê dano û xebatanê ajanîye keno. Rapor de ame vatene ke Almanya hedefê MÎTî de ya.
