Seba serrgêra 100. ya Peymana Lozanî wextêko tay mend. Kurdî xo amade kenê ke binê sîwana KNKyî de bi hemkarîyêka hîra çalakîyanê Lozanî serûber bikerê. La PDK ancî venngdayîşanê serê yewîye red keno. 

Serkêşîya Kongreya Neteweyîya Kurdîstanî (KNK) û Kongreya Komelê Demokratîkî ya Kurdîstanijanê Ewropa (KCDK-E) de 52 rêxistinê kurdan binê nameyê Komîteya Vera Peymana Lozanî xebatanê serrgêra Peymana Lozanî kenê. 

PDKyo ke mîyanê nê xebatan de canêgêno, 27-28ê gulane de otêla Royal Savoyî ya Lozanî dde konferansêk da. Goreyê agahîyan sîyasetmedar Hatîp Dîcle, Prof. Bîlgîn Ayata, Prof. Abbas Valî û Prof. Pishko Hamatahir do beşdarê konferansî bibîyêne.

La sîyasetmedar Hatîp Dîcleyî vera ney nêrazîbîyayîşê xo mojna û pare kerd ke hayîya ey konferansê winayênî ra çin a. Dîcleyî vat: ''Xebera mi konferansê winayênî ra çin bîye. Ganî ma serrgêra 100. ya Lozanî de sey kurdan pîya têgêrayêne. La êyê ke nênê yewîye wina nêzdîyê ma benê.''

Hetê bînî ra Hemserekê KNKyî Ahmed Karamusî ANFyî rê qisey kerd û da zanayene ke ê 2014î ra nata xebata yewîye kenê la rixmê pêro vengdayîşanê înan zî Mesûd Barzanî, Nêçirvan û Mesrûr Barzanîyî cewabêk zî nêda dawetanê înan.

Karamusî bale ante ser ke Mesûd Barzanîyî bi mesajêkê nuştekîyî konferansê Royal Savoyî de yewîya kurdan waşta la no waştişê ci samîmî nîyo. Karamusî vat: ''Binê sîwana KNKyî de 56 partî û rêxistinê kurdîstanijî, bi desan beşê komelê kurdan û bi seyan şexsîyetî cagênê. Eke Barzanî nînan sey kurdan nêvîneno o çax venga kamî dano? 

Ma kenê ke vera Peymana Lozanî bibê yewveng. Nika ê Lozan de konferans kenê la wa xo rê pers bikerê ke konferansê înan Kurdîstanî yo yan nê? 24 serrî yo ma kenê ke yewîya kurdan bîyarê ca. Ma amade yê ke her kesî de xebatan bikerê. Eke Birêz Mesûd Barzanî raşta zî samîmî yo wa bêro hetê ma. Ma seba caardişê yewîya kurdan amade yê.''