Raporê serra 2018’î yê Rêxistina Pawitişî ya Qanûnê Bingeyî de ame vatene ke ganî sîyasetê krîmînalîzekerdişê têkoşînê azadîye yê Kurdan dewam bikero. Wextê eşkerakerdişê raporî de polîsan bajarê Hannoverî de eşt serê keyeyanê Kurdistanijan.

Teba hunermend Ciwan Çewlîk, Hemserekê Meclîsê Şarî yê Hannoverî Emîn Seydo û sîyasetmedaro Kurd Evdila Efeyî polîsanê Almanan eşt serê keyeyanê 7 Kurdistanijan. Sebebê sereştişî zî çalakîyê kulturkî bîyî.

Sereştişî de telefon û çi-mîyê taybetî ameyî destsernayene. Derheqê sereştişî de sîyasetmedar Efeyî zanayîşî dayî ANF’yî û vat, “Bi tesadûfî nîyo ke vernîya çalakîyanê seba vîrardişê Halîm Denerî erzenê keyeyanê ma ser. Bi sereştişan nêeşkenê polîsêko ciwano Kurd Dener kişto bidê vîrrakerdene.”

Efeyî da zanayene ke ê pawenê ke çalakîye seba vîrardişê Denerî hîna bi xurtî bêrê viraştene û vat, “Polîsê Almanî bi zanayîş hêriş bi rêxistina meşrû û legal a şarê Kurdî kenê.”

Efeyî ard ziwan ke vîrardişê kesanê ke têkoşînê vera DAÎŞ'î de cuya xo vîndî kerda, viraştişê çalakîyanê kulturkî hetê polîsan ra sey suc yenê dîyayene û vat, “Gelo Kurdî  do nêeşkayê şehîdanê xo yad bikerê, nêeşkayê roşananê xo yê neteweyî pîroz bikerê?”

Eyaletê Hessenî de bajaranê Gîessen, Russelsheîm û Maînzî de çend rojî verê cû polîsan eştîbî serê keyeyan û sîyasetmedaro Kurd Mazhar Tûran destbend kerdibi.