Polîsê almanan rixmê qeraranê mehkeme sîyasetê krimînalîzsyonî yê vera sembolanê Têgêrayîşê Azadîye yê Kurdan de kerdo xo çeng. Polîsê almanan bitaybetî tay bajaran de çalakîyan de îdîa kenê ke  kiriştişê beyraqanê YPG û YPJyî qedexe yo. Nê bajaran ra yew zî Berlin o.

Tewr peynî de 10ê êlula 2022yî de çalakîya ke semedê protestokerdişê hêrişanê dewleta tirke yê vera Rojawanî ameye kerdene de polîsan destûr nêda zaf beyraqê YPG û YPJyî bêrê akerdene la eslê xo bingeyê nê qedexeyî çîn o.

Menga gulane de seba ke Almanya de qedexeyê PKKyî bêro wedaritene avûkatan muracatê Wezîrîya Karanê Zereyî kerdbi. Nê avûkatan ra. Avûkat Dr. Lukas Theuneyî derheqê babete de ANFyî rê qisey kerd.

Avûkat Dr. Lukas Theuneyî vist vîrî ke polîsanê Berlinî verî zî qerarê mehkeme nas nêkerd û vat: ''Eslê xo de Almanya de qerarê qedexekerdişê beyraqanê YPG û YPJyî çîn o. Ganî wezîfedarê asayîşî goreyê qanûnan têbigêrê. Polîsê ke pabesteyê Mudirîya Asayîşê Berlinî yê zanê ke beyraqê YPG û YPJyî qedexe nîyê la rixmê nê çalakîyan de wina vera beyraqan tewir genê.  Polîsê Berlinî zaf hole zanê ke vera nê beyraqan wina yew qedexe çîn o, çunke înan yew mehkeme de no qebul kerd. Polîsan a dewa de soz da ke ê do ameyox de vera beyraqanê YPG û YPJyî û sembolanê ci qet çîyêk mekerê. Inkey aceb o ke nê qerarî nêvînayîşî ra yenê.''

Qeraro ke Dr. Lukas Theune qala ci keno 7ê adara 2018î de hetê Mehkemeya Îdarî ya Berlinî ra amebi girewtene. Pîya bi Berlinî heta inkey Aachen, Frankfurt, Sigmaringen, Gelsenkirchen û Magdeburg de mehkemeyanê cayîyan de qerar ame girewtene ke beyraqê YPG û YPJyî qedexe nîyê û dewayê ke derheqê çalakîkeran de ameyî akerdene yew bi yew ginayî war.

Reyna gama ke 2ê adara 2017î de Wezîrîya Karanê Zereyî qedexeyê vera sembolanê Têgêrayîşê Azadîye yê Kurdan hîra kerd, hukmatê dewrî vatbi beyraqê YPG û YPJyî mîyanê sembolanê qedexeyan de nîyê. Hukmatê ke cewabê persanê Partîya Çepe dabi vatbi Almanya YPG û YPJ sey tehdîtî nêvînena.