Almanya de mîlyonêkî ra zafêr kurdî estê ke mexdûrê sîyasetê krîmînalîze yê dewlete yenê û tim raştê hêrişê polîsan yenê. Tewr peynî de polîsêk seba ke hêrişê kurdêk kerdo ame cezakerdene.

Rojanê ravêrteyan de çapemenîya Almanya de bi sernameyê polîsê lapakerî rê ceza xeberêke weşnîyaye. ANF resa detayanê xebare.

1ê kanûna 2018î de paytext Berlin de seba ke qedexeyê PKKyî yo ke 1993î ra yeno caardene, bêro protestokerdene çalakîyêke ameye organîzekerdene. Polîsan hêrişê çalakwanan kerdbi û tay ciwanê ke ameybî destbendkerdene raştê şîdetê polîsan ameybî. Ciwanan ra yewî ke bitaybetî polîsê bi nameyê Tony A.yî ra îşkence dîbî waşt ke gereyê ci bikero la seba ke destê ci de belgeyêk çînê bo nêeşka çîyêk bikero.

La polîsa bi nameyê Lisa G. ya ke  eynî çalakîye de wezîfekare bî seba ke Tony A. her çalakîye de hêrişê kurdan keno, derheqê ci de cipêrsayîş da destpêkerdene. Badê cipêrsayîşê Midurîya Asayîşî ya Berlini û dozgerîye Mehmekeya Cayîye ya Berlinî de dewa ameye akerdene û bi şahîdîya polîsa cinîye Lisa G. polîso hêrişkar Tony A. rê cezaya 1 serre û 3 aşman ameye birnayene. Tony A.yo ke bi şertê serbestîya kontrolkî zîndan nêkewt, wezîfe ra ame eştene.