Înîsîyatîfê Kurdîstanî Bipawê (Defend Kurdîstan) vera îşxal û qirkerdişî yê dewleta tirke yê Kurdîstanî Lozanî ra heta Cenevre rayraşîyayîşêk organîze kerd. Rayraşîyayîş verê banê Château d'Ouchy ke Pêkerdişê Lozanî tede ame îmzakerdene de dîya destpêkerdene.

Sere de Fransa û Almanya xeylêk welatanê Ewropa ra kurdîstanijê çar perçeyan, sîyasetmedarê kurd, tirk û swîsreyîjî, rêxistinê komelê sîvîlî, dezgehê demokratîkî, hunermend, nuştox û akademîsyen zî tede bi seyan kesî cayê destpêkerdişê rayraşîyayîşî de ameyî têhet.

Mitîng bi rêzgirewtişê semedê şehîdanê têkoşînê azadîye yê Kurdîstanî dest pêkerd. Dima ra qiseykerdişî ameyî kerdene û xoverdayîşê gerîlayan ame selamkerdene.

Hemserekê KNKyî Ahmet Karamusî ard ziwan ke serrgêra seyên a Pêkerdişê Lozanî de  yewno waştene ke destkewteyê ke şarê kurdî pê têkoşînî fînayî dest, pê hêrişê qirkerdiş û îşxalî dest ra bêrê girewtene û vat: ''Ma do xeta xoverdayîşî ya Rayberê Şarê Kurdî Abdullah Ocalanî û gerîlayan esas bigîrê û destûr medê ke Lozanêko bîn bêro ciwîyayeyene. Ma do vera hêrişê îşxalî û qirkerdişî ke pê paştdayîşê welatanê Ewropa û PDKyî yeno kerdene, wayîrê xoverdayîşê Rayberîye û gerîlayanê xo vejîye û semedê Yewîya Neteweyîye ya Kurdan têkoşîn bikerê.''

Endamê Konseya Rayberdişî ya KNKyî Zubeyîr Aydarî vat: ''Ma ewro cayo ke Pêkerdişê Lozanî ame îmzakerdene ra ver bi Neteweyanê Yewbîyayan ê Cenvere rayra şinê û vanê ke ma dewamê Pêkerdişê Lozanî nêwazenê. Pêkerdişo ke 100 serrî verî bi semedê ma hukmê ci çîn o.  Wa hêzê îşxalkerî û paştgêrê înan hole bizanê ke Ewropa de hêrişê vera dezgehanê kurdan û polîtîkaya herişkare ya dewleta tirke ya faşîst seyyewbînan ê. Nimûneyo peyên zî vizêr Almanya de vera KCDK-e ame kerdene. Ma do vera nê hêrişan pê Yewîya Neteweyîye ya Kurdan cewab bidê.''

Mîtîng de sîyasetmedaranê swîsreyîjan û temsîlkaranê Defend Kurdîstan zî qisey kerd û semedê paştayîşê têkoşînê kurdan veng da. Bado ke temsîlkaranê TJK-E, PYD û dezgehanê bînan zî qisey kerd rayraşîyayîşî dest pêkerd. Çalakwanî saetanê nêmroje de resayî bajarê Rennesî. Rayraşîyayîş ewro do bajarê Morgesî de biqedîyo.