Rayraşîyayîşê yewîya neteweyîye yo ke Locanî ra verbi Cenevre ame viraştene û  4 parçeyanê Kurdîstanî ra sîyasetmedar, nuştox, hunermend, rojnameger, akedemîsyen û temsîlkarê dezgeh û partîyanê sîyasîyan ra 100 ra zafêr kesî tewr ci bîyî,  bi vengdayîşê yewbîyayîşê partîyanê kurdan qedîya.

Rayraşîyayîşê di rojano ke vernîya Ofîsê Neteweyê Yewbîyayeyî (NY) de qedîya de bale ameye antene muhîmîya yewbîyayîşê kurdan ser. Qiseykerdişan de ame vatene ke vera hêrişê Tirkîya, Îraq, Îran û Sûrîye ganî yewîya kurdan bêro raameyene. Reyna ame vatene ke Kurdîstan heme sîyasetan ra hîna erjaye yo û ganî heme partîyê kurdan semedê pawitişê Kurdîstanî gamêk bierzê.  Kurdîstan û erjê şarê kurdî heme çîyan ra hîna erjaye yê. Qiseykerdoxan ard ziwan ke eke kurdî bibê yew îşxalkarîye Kurdîstanî ra raqilnenê û erzenê teber.

Hetê bînî ra Serekê Pêroyî yê Partîya Hewzan o verên yê Swîsre Ueli Leuenberger û endamê Meclîsê Şaredarîya Cenevre Alfonzo Gomez ê ke  semedê paştdayîşî tewrê rayraşîyayîşî biyî vat ê do her şertan de cayê şarê kurdî ca bigêrî û paştî bidê ci. Sîyasetmedaran hêrişê îşxalî yê dewleta tirke yê vera Rojawanî zî şermezar kerd û waşt ke Ewropa vera naye bêveng nêmano.