40. Roniştişanê Heqanê Merdiman ê Konseya  Heqanê Merdiman a Neteweyê Yewbîyayeyî ya ke 25'ê Sibate de Ofîsê Neteweyê Yewbîyayeyî (NY) yê Cenevre de dest pê kerdo, dewam keno. 40. Roniştişanê Heqanê Merdiman de binpaykerdişê heqanê merdiman ê welatanê cîyayan ameyî munaqaşakerdene. Roniştişan de polîtîkaya dewleta Tirkîya ya Sûrîye ameye rexnekerdene û analîstê pêkewtişê mîyanneteweyî yê Amerîka Dr. Thoreaû Redcrowî roniştişî de qisey kerd û bale ante serê îşxalkarîya dewleta Tirkîya ya Efrînî.

TIRKÎYA PAKKERDIŞO ETNIK KENA

Redcrowî destpêkerdişê qiseykerdişê xo de îşxalkarîya dewleta Tirkîya ya Efrînî şermezar kerde û wina vat, “Ez wazena bala konseye bianca serê serebûtanê Rojawanê Kurdistanî yanî Vakûrê Sûrîye yo ke binê îşxalkerdişê dewleta Tirkî de yo. Îşxalkerdişê Efrînî yê hetê dewleta Tirkî ra dima, herême de ciwîyayîş seba şarê bi kabûs. Îşxalkerdişê dewleta Tirkî ra ver Efrîn herême tewr biasayîş bîye û seba bextwaştoxan bîbî stargehe. Thoreaû Redcrowî vat dimayê îşxalkerdişê dewleta Tirkî herême de pakkerdişo etnîk yeno kerdene û wina dewam kerd, “Karxane û keyeyê Kurdan hetê eskeranê Tirkan û grubê ke pabesteyê ci yê ra ameyî talankerdene. Mîrasê tarîxî û abîdeyê Kurdan ê ke bajar de yê ameyî îhmakerdene. Bajaro ke ameyo îşxalkerdene de tecawûzî, sûîkastî, seba fîdye remnayîşê merdiman û zaf kerdişê dînî yenê ciwîyayene. Bajar de sîstemê perewerdeyî û nameyê kuçeyan bi tirkî ame vurnayene. Zeytûnê Efrînî û warîdato ke tîya ra yeno dest na ra ser. Nê hemeyî nîşan danê ke bi destê dewleta Tirkî Efrîn de pakkerdişo etnîk yeno kerdene.”

GANÎ VERA TEHDÎDANÊ ERDOGANÎ BÊVENG NÊRO VINETENE

Redcrowî da zanayene ke tersê ci o yo ke çîyo ke Efrîn de bîyo Vakûrê rojhetê Sûrîye de û herêma Rojawanî de zî bêro ciwîyayene û vat, “Nê çend mengî yê Erdogan tehdîtê îşxalkerdişê herême keno. Wezareta Parwitişî ya Tirkîya tehdîtê çinkerdişê YPG, YPJ û SDF’î (QSD) keno ke DAÎŞ hetê nê hêzan ra ame binkewtene. Vera naye bêvengîya cimatê mîyanneteweyî nêna qebûlkerdene.”

GANÎ NY ÇÎYÊK BIKERO

Tewr peynî de Thoreaû Redcrowî vengdayîşê NY’î kerd ke herêma Rojawanî seba wareyê hewayî bêro qedexekerdene û vera tehdîtanê Erdoganî çîyêk bikerê û vat, “ Şarê herême yo ke bi qehremanîye vera DAÎŞ’î şer kerdo ganî bêro pawitene û heq keno ke zereyê haştîye de biciwîyo. Ewro heme dewletê ke tîya de amadeyê ganî YPG, YPJ û Hêzanê Sûrîyeya Demokratîke (QSD) rê sipas bikerê. Ganî destûr nêro dayene ke Rojawan o ke vera DAÎŞ’î şer kerdo û ser kewto bierzîyayo zereyê tehlukeyî.”