Hemserekê KONGRA-GELî Remzî Kartalî hêrişê vera Rojawanî, pêvînayîşê bi Rayber Apoyî û rewşa welatî ya peyêne ajansê ma rê ercnayî.

Kartalî bale ante pêvînayîşanê bi Rayber Apoyî ser û vat: ''Mesajê ke Rayber Apoyî pêvînayîşan de dayê zaf girîng ê û ganî pêro terefî bi mesuldarî nêzdîyê nê mesajan bibê. Hinî Tirkîya de tena kurdî ney pêro komel çareserîya meseleya kurdan wazeno. Şar prosesêkê neweyî wazeno. Çareserîya meseleya kurdan temînatê ameyoxê şaran o.

Nêzdîbîyayîş û uslubê çapemenîya îqtîdarî bi nê qewimîyayîşan û Rayber Apoyî rind nîyê. Ganî bi cidîyetî her kes nêzdîyê nê qewimîyayîşan û Rayber Apoyî bibo. Rayber Apo şarêkî temsîl kenoı. Eke îmkanî bêrê awankerdene o do bieşko mesele çareser bikero. La seba ney ganî hêverî tecrîd bêro wedaritene. 

Ganî roşnvîr û komelo sivîl zî tewrê nê prosesî bibê la ganî gama verêne Meclîs de bêra eştene. Ganî partîyê sîyasîyî, bi taybetî muxalefet ney xo rê sey erkêkî bivînê. Xora Rayber Apoyî zî venga muxalefetî da. Ganî CHP û partîyê bînî bizanê ke meseleya kurdan tena meseleya îqtîdarî nîya. Ganî her kes bi mesuldarî têbigêro. 

Hişmenîya 'Ma tedaya PKKyî bikerê, bi zorî tay çîyan bidê qebulkerdene' raşt nîya. Mesele ne Rayber Apo ne zî PKK yo. Mesele nêzdîbîyayîşê dewlete yo. Ziwanê şer û hêrişan faydeyê çîyêkî do nêkero. Ma ancî venga îqtîdarî danê ke Hêrişê vera Rojawanî pêro prosesê Tirkîya veng kenê. Nêzdîbîyayîşê Tirkîya vera Rojawanî îmtanêk o.

Hemleya 'Abdullah Ocalanî rê Azadîye, Meseleya Kurdan rê Çareserîye' ganî bi xurtî dewam bikera. Xora nê pêvînayîşî destkewteyê na hemle yê. Çareserîya meseleya kurdan û azadîya Rayber Apoyî pabesteyê yewbînan ê. Ganî her kes seba ney mesuldarî bigêro xo milî.''