RiseUp4Rojava derheqê kampanyaya paştîdayîşî ya yew hewteyî ke 1ê Teşrîna Peyêne de dayebî destpêkerdene eşkerayîye daye û nê pare kerdî:

Çarçawe kampanyaya paştdayîşî de her hetê dinya de vera hêrişê rejîmê Erdoganî yê vera Rojawanî çalakîyê protestoyî ameyî kerdene û paştî dîyaye xoverdayîş û şorişê Rojawanî. Hewteyê çalakîyan 1ê Teşrîna Peyêne Roja Kobanê ya Dinya de dest pêkerd ke bi mîlyonan merdimî semedê selamkerdişê xoverdayîşê destankî yê Kobanê ke vera DAÎŞî ame dayene, vejîyayî kuçeyan û têgêrayîşêko entrnasyonalîst vet meydan. Hewteyo ravêrte de seranserê dinya de 150î ra zafêr çalakîyî ameyî kerdene. Xeylêk cayan de karxaneyê ke Tirkîya reyde hemkarîye kenê, çeke û malzemeyê ci roşenê ci vera înan çalakîyî ameyî kerdene.

Eşkerayîye de ca dîya vatişanê vervatoxanê Komunê Enternasyonalan ê Rojawanî Şoreş Ronahîyî. Ronahîyî vat: ''Eke ma wazenê şerê dewleta tirke yê vera deskewteyanê şorişgeran, Kurdîstan û şarê sivîlî yê Sûrîye  vindarnê ganî ma çimeyê şerî bibirnê.'' Ronahîyî vist vîrî ke tay karxaneyî hînî malzemeyê çeke nêdanê Tirkîya û vat: ''Ganî ma nê serkewtişê netîceya kampanya ser o zaf çîyanê bînan înşa bikerê ke wa zextê serê Tirkîya bêro pîlkerdene. Ma bi seyan çalakîyan hêrişê dewleta tirke protesto kerd û semîneran û aktîvîteyanê zanayîşdayîşî ûmidê Rojawanî vila kerd. Ganî nika her wextî ra zafêr Rojawanî rê bêro wayîrvejîyayene û lezabez paştî bîdiyo ci.''