Vera rojnameger Mark Campbellî seba ke 23ê nîsane de London de çalakîya vera hêrişanê dewleta tirke de alaya PKKyî berz kerde û vera cinîya kurde Bêrîtane Silêmanî seba ke meqapo çeqer eştbi Mesrûr Barzanî dewa ameye akerdene.

Roniştişo verên ê dewa 18ê teşrîna peyêne de London de Mehkemeya Cezaya Sulhe de do bêro kerdene.

Campbellî derheqê dewa de qisey kerd û pare kerd ke polîsanê îngilîzan çalakîye de hêrişê çalakîkeran kerdo, dest na alayanê PKKyî ser û vat: ''Polîsan seba ke dewleta tirke weş bikerê hêrişê çalakîye kerd. Coka mi vera nê şîdetê polîsan alaya PKKyî akerde. Na ala sembola têkoşînê kurdan a û 1985 ra nata şuxilîyena. Seke mehkemeya Belçîka tesbît kerdbî PKK rêxistinêka terorî nîyo, PKK terefêkê yew şerî yo. Ez do mehkeme de îsbat bikera ke dewleta tirke kurdan krîmînalîze kena û dewleta Îngilîstanî zî paştî dana ney. Dewleta tirke kurdî sey 'terorîst'î mor kerdî, qir kerdî û dewê înan vêşnayî, îşkenceyê kurdan kerd.''

Campbellî ard ziwan ke o do pawitişê xo de qala ci bikero ke Rayberê Şarê Kurdî Abdullah Ocalanî û PKKyî senî serkêşîya xoverdayîşê kurdan kerda û kurdan senî vera DAÎŞî merdimatîye pawita. Campbellî vat: ''Zaf îronîk o rixmê kerdişanê xiraban ê dewleta tirke zî PKK lîsteya terorî de yo. Ganî Îngilîstan mebe hemkarê sûcanê dewleta tirke û pê bacanê ma mehkemeyan de kurdan krîmînalîze mekerê.''

Campbellî dîyar kerd ke ganî mehkemeyê Îngilîstanî hetê Tirkîyaya ke rejîmêkê dîktatorîye yo, ra nêra polîtîzekerdene û vat: ''Ez do ehkeme de alaya PKKyî bipawa. Berzkerdişê na ala rûmet o, ma do ney bi rûmetî mehkemeyan de îfade bikerê.''

Rojnameger Mark Campbellî venga pêro roşnvîran, hêzanê demokrasî da ke derheqê dewa de hîsger bibê.