Rojnameyo namdar ê Swêdî Aftonbladetî derheqê komkiştişê Armenîyan-Suryanîyan de meqaleyê wekîlanê Partîya Lîberale yê ke namzedê wekîlîya Yewîya Ewropa (YE) yê Karîn Karlsbro û Saîd Abdu û 2 rayberanê hukmatê Swêdî weşanayî. Meqale de yeno waştene ke 24’ê Nîsane sey, “Roja Vîrardişê Komkiştişê Armenîyan-Suryanîyan” bera qebûlkerdene.

Meqale de ame vatene ke komkiştişî ser o 100 serrî derbaz bîyî, rixmê naye zî Tirkîya hîna komkiştişî înkar kena û kam qalê komkiştişî bikero derheqê înan de dewayî yenê akerdene.

Wekîl û selahîyetdaran da zanayene ke derheqê endamîya Tirkîya ya Yewîya Ewropa munaqeşeyê cîdî ameyê kerdene û da zanayene, Tirkîya wareyê demokrasî, huqûq û heqanê merdiman de xeylî apay de şîye. Meqale de ame vatene ke dimayo ke Erdogan bi serekomar demokrasî werte ra wedarna û hêriş û zextî serê Kurdan û binpankerdişê huqûq û heqanê merdiman zî nimûneyê naye yê û ame vatene, “Hema hema pêroyê şarê Xirîstîyanan werte ra ame wedarnayene.” Selahîyetdaranê Partîya Lîberale Serekomarê Fransa Emanuel Macronî seba qerarê ey o ke 24’ê Nîsane sey, “Roja Vîrardişê Komkiştişê Armenîyan” îlan kerda, o pîroz kerd û da zanayene ke ganî no hemeyê Ewro de bêro qebûlkerdene.

Demokratê Xirîstîyanan: Seba Tirkîya sebrê ma nêmend

Hûmara vizêrî ya rojnameyê Svenska Dagbladetî de meqaleya serekê Partîya Demokratanê Xirîstîyan Ebba Bush Thorî û ya namzetanê parlamentoyê YE Sara Skyttedale û Davîd Regayî yê ke wazenê muzakereyê Tirkîya yê seba endamîya YE bêro vindernayene ameyî weşaneyene. Meqaleyan de ame vatene ke sebrê Demokratanê Xirîstîyan ê seba Tirkîya nêmendo, coka ganî prosesê muzakereyan bêro vindernayene, zext bi Tirkîya bêro kerdene ke hemberê heqanê merdiman û demokrasî de hîsgêre ba.