Serekê Koalîsyonê Konvansîyonê Çekanê Kîmyewîyan (CWC) û Hetkarê Serekê Heyetê Rayberdişî yê Komeleya Kontrolkerdişê Çekan Dr. Paul F. Walkerî derheqê hêrişanê kîmyewîyan ê dewleta tirke de ANFyî rê qisey kerd.

Dr. Paul F. Walkerî ard ziwan ke raporê IPPNWyî yê serê Başûrî de yeno vatene ke dewleta tirke klor û CS şuxilnayê ke çekê kîmyewî yê. Walkerî pare kerd ke Koalîsyonê CWCyî hêrişê kîmyewî yê vera Sûrîye û Iraqî tim şermezar kerdê. Walkerî îfade kerd ke raporê IPPNWyî zaf girîng o û vat: ''Bi taybetî doneyê serê şuxilnayîşê klor û madeyanê jehrînan zaf girîng ê. Madeyê kîmyewî yê endustrîyelî warê leşkerî de qedexe yê. ''

Walkerî dîyar kerd ke îdîa, agahî, belge û doneyê serê şuxilnayîşê çekanê kîmyewîyan ganî bêrê cigêrayene û vat: ''Ganî na rewşe de dewletê eleqedarî yê pabesteyê Konseya OPCWyî cigêrayîşî biwazê, herême de nimûneyî bêrê arêdayene û mexdûrî bêrê kontrolkerdene. A raşte OPCW, Neteweyê Yewbîyayeyî wayîrê ê hêzî yê ke derheqê hêrişanê kîmyewîyan de cade cigêrayîşêkî bidê destpêkerdene. La ganî seba ney zî xîretêko hempar bêro mojnayene. Verî ke erey nêbo ganî herême de çekanê kîmyewîyan ser o cigêrayîş bêro kerdene.

CWC seba ke na babete bikewa rojdem do xîret bikero û dewletanê eleqedaran rê seba cigêrayîşî teda bikero. Ma do na menge Lahey de konseransêk bidê û tede na babete bîyarê rojdem.''