Hewteyêk verî bi bahaneya ke destek dano Têkoşînê Azadîya Kurdan Almanya aktîvîsta îspanyole Maria V. sînorî ra teber kerdbî. Almanya birêka winasêne seba rojnamegerê îngilîzî Matt Broomfieldî daye.

Broomfield 3 serrî Rojawan de mend û seba 'Vice', Independent’ û ‘New Statesman’ qewimîyayîşê Rojawanî kerdî xebere.

Broomfield 27ê nîsana 2021î de wexto ke pê keştîye Yunanîstanî ra şîyêne Îtalya hetê polîsanê îtalyanan ra amebi destbendkerdene û teslîmê selahîyetdaranê Yunanîstanî amebi kerdene, erşawîyabi Îngilîstanî.

Broomfieldî îfade kerd ke wextê teslîmkerdişê Îngilîstanî de ci rê ame qedexekerdene ke şoro welatanê Schengenî. Dîya zanayene ke bire waştişê Almanya ser o ameya girewtene.

Broomfieldî ard ziwan ke seba ke o destek dano Îdareyê Xoserî yê Rojawanî na bire ameya dayene û vat: ''Têkoşînê azadîye, demokrasî û heqanê cinîyan rê paştdayîş ganî sûc nêbo. Astengkerdişê seyahetê aktîvîstanê ke paştî danê têkoşînê Rojawanî û şarê kurdî nêno qebulkerdene.''