Seba Mahmut Yilmazî merasîmêkî do bêro kerdene
Mahmut Yilmazo ke mîyanê komelê kurdan ê Almanya de şinasîyayêne û bi serran seba şarê kurdî têkoşîn kerd dinyaya xo bedilnaye. Seba Yilmazî ewro do merasîmêk bêro kerdene.
Welatperwero kurd, kedkarê serran Mahmut Yilmaz şaristanê Munchenî yê Almanya de mîyanê şertanê surgunîye de roja şemeyî dinyaya xo bedilnabî. Yilmaz 1981 de wexto ke 17 serre bi Almanya de babîyê xo reyde bi xebatkar. O babîyê çar domanan bi.
Yilmaz serranê 80an de seba ke Almanya verê îşkence û qirkerdişanê Tirkîya peygoşîye kerdêne tewrê çalakîyan bi. A çalakîyêke ra dima 1996 de tepişîya û 2,5 serran zîndanê Almanya de mend. Yilmazî mabênê serranê 1999 û 2000an de zî îdarekarîya YEK-KOMî kerde.
Seba Yilmazî ewro Komeleya Elewîyan a Munchenî de merasîmê cenaza do bêro kerdene. Dima cenaza Îstanbul de do bêra definkerdene.
