Çalakîya Rayraşîyayîşê Dergî ya ke her serre seba azadîya Rayberê Şarê Kurdî Abdullah Ocalanî yena kerdene, emser do mabênê 5-11ê êlule de Hannoverî yê Almanya de dest pêbikera. Rayraşîyayîş bi sloganê 'Seba azadîya Rayber Apoyî, pîya serewedaritiş' heta Hamburgî do dewam bikera.

Rayraşîyayîşo Derg emser çarçewa hameya 'Pîya sere wedarê' do bêro kerdene. Yeno pawitene ke Fransa, Almanya, Swîsre, Avusturya, Swêd, Îngilîstan û pêro Ewropa ra bi seyan ciwanî tewrê rayraşîyayîşî bibê. Komîteya Amadekarî ya Rayraşîyayîşî zî eşkerayîyêke weşanaye.

Eşkerayîye de ame vatene ke faşîzmê dewleta tirke pêro Kurdîstan de resa asta tewr berze û seba ke tecrîd bêro şiknayene Rayraşîyayîşo Derg zaf girîng o. Komîte venga ciwananê kurdan û ciwananê enternasyonalîstan da ke tewrê çalakîye bibê.

Komîte pare kerd çalakîye do bi ruhê xoverdayîşê Cengê Heftanînî bêra kerdene û Ewropa rê mesaj do bêro dayene ke wa nêbê hemkarê dewleta tirke. 

Bernameyê Rayraşîyayîşî

Ciwanî do roja 4ê êlule şaristanê Hannoverî de kom bibê. Bernameyê Rayraşîyayîşî wina yo:

"Roja verêne: Hannover-Lehrte

Roja diyîne: Lehrte-Celle

Roja hîrêyîne: Celle-Unterluß

Roja çarine: Unterluß-Luneburg

Roja pancine: Luneburg-Winsen-Luhe

Roja Şeşine: Winsen-Luhe-Harburg

Roja Hewtine: Harburg-Hamburg."