Komîteya Xebatanê Serrgêra Seyin a Pêkerdişê Lozanî semedê tewrbîyayîşê mîtîngê Lozanî veng da. Mîtîng do 22ê temmuze de saete 11.30 de “Place de la Navigation” de  bêro kerdene.

Eşkerayîye de nê ameyî vatene: “ Pêkerdişê Lozanî seserrî xo dima verdayî. Netîceya Pêkerdişê Lozanî de Kurdîstan ame letekerdene û şarê kudî raştê qirkerdiş, înkar, barkerdiş ame. Pê nê pêkerdişî mekanîzmaya kolonyalîzmî ya serê kurdan ameye meşrûkerdene. Şarê Kurdî tarîxê xo de no pêkerdiş çirey qebul nêkerd û do çirey qebul mekero.

Şarê kurdî serrgêra seyin a nê pêkerdişî de 22/7-2023  de pê rayraşîyayîş û mîtîngî wazeno îradeyê xo yê çareserî, nasname û estbîyayîşê xo bimojno heme dinya. Ma veng danê şarê kurdî û dostanê ci ke wa tewrê nê rayraşîyayîşê tarîxî bibê. Tewrbîyayîşê şima wezîfeyo neteweyî yo, wayîrvejîyayîşê şerefî yo. Waştişê ma o yo ke heme kurdî û kurdîstanijî tewrê rayraşîyayîş û mîtîngî bibê.”