Bi wesîleya 1ê Teşrîna Peyêne Roja Kobanê ya Dinya xeylêk şaristananê Ewropa de çalakî û şayîyî ameyî kerdene.

Şaristanê Berlinî yê Almanya de vengdayîşê Meclîsê Cinîyan ê Dest-Danî û Nav-Berlinî ser o xoverdayîşê Kobanê ame selamkerdene û hêrişê kîmyewîyî yê vera gerîlayan ameyî protestokerdene. Çalakîye bi slogananê sey “Bijî berxwedana Kobaniyê“, “Bijî berxwedana gerîla“ û “Jin, jiyan, azadî“ qediyaye.

Şaristanê Limasolî yê Kibrisî de serkêşîya PYDyî de şayîyêke ameye viraştene. Şayîye de fotografê Rayberê Şarê Kurdî Abdullah Ocalanî, alayê PKK, YPJ ûn YPGyî ameyî daliqnayene, sloganî ameyî vatene. Şarî şayîye de bi deyîran govende girewte.

Şaristanê Frankfurtî yê Almanya de serkêşîya Meclîsê Cinîyan ê Amara û Merkezê Komelê Demokratîkî yê Kurdan de şayîyêke ameye kerdene. Şayîye de koma Bêzarî vejîyaye sehne ser. Şayîye de dima ke mesajê dezgehan ameyî wendene beşdaran govende girewte.

Şaristanê Kasselî yê Almanya  serkêşîya Merkezê Komelê Demokratîkî yê Kurdan de verî rayraşîyayîşêk ame kerdene dima zî mîtîngêk ame kerdene. Mîtîng de vilawekî ameyî vilakerdene, xoverdayîşê Rojhelatê Kurdîstanî ame selamkerdene û hêrişê kîmyewîyî yê dewleta tirke ameyî teşhîrkerdene.

Şaristanê Zurihî yê Swîsre de vengdayîşê YJK-Syî ser o rayraşîyayîşêk ame kerdene. Rayraşîyayîş de xoverdayîşê gerîlayan ame selamkerdene. Qiseykerdişan de ame vatene ke dewleta tirke sey cerganê DAÎŞî hêrişê şarê kurdî û gerîlayan kena. Çalakîye de veng dîya ke wa her kes tewrê peydakerdişê maskeyanê gazî bibo ke seba gerîlayan yenê arêdayene.