Peymana Lozanî 24ê temmuza 1923yî de şaristanê Lozanî yê Swîsre de amebî îmzakerdene û Kurdîstan bi na peymane amebi parçekerdene. Serra 100. ya Peymana Lozanî de nêrazîbîyayîş, nawnayîş û çalakîyê kurdîstanijan dewam kenê.

'Komîteya Kar û Çalakîyanê 100 Serrîya Peymana Lozanî' xeylêk rayraşîyayîş, panel, pêramotiş, konferans û eşkerayîyanê çapemenîye serûber kena. Endamanê komîte ra Hemserekê Kongreya Komelê Demokratîkî ya Kurdîstanijanê Ewropa (KCDK-E) Yuksel Koçî derheqê babete de ANFyî rê qisey kerd.

Koçî vist vîrî ke adara 2021î de kombîyayîşê KNKyî de pêro karê xo ercnayê û karê nikayênî zî binê siwana KNKyî de yenê kerdene. Koçî vat: ''Kombîyayîş de bire dîyaye ke vera Peymana Lozanî komîteyêka hîra wa bêra awankerdene. Komîte ameye awankerdene û Rojawan, Başûr, Vakur, Rojhelat û Ewropa ra 57 dezgehê partîyanê Kurdîstanî û dostê kurdan tewrê ci bîyî. Reyna komîte de temsîlkarê asûrî-sûryanî, armenî, êzidî, elewî, cinî û ciwanan est ê. Başûrî ra Tevgera Goranî û YNK, Rojhelatê Kurdîstanî ra Komala û PJAK, Rojawanî ra Îdareyo Xoser û pêro partîyî û Vakurî ra xeylêk rêxistinî komîte de yenê temsîlkerdene. Yanî PDKyî ra ber pêro rêxistinê Kurdîstanî mîyanê komîte de yê.''

Koçî pare kerd ke 23yê temmuza 2022yî de Qesra Rûmîne ya Peymana Lozanî de konferansêk ameyo kerdene la rixmê israrê KNKyî zî PDK û rêxistinê nêzdîyê ci tewrê konferansî bîyê. Koçî vat: ''Ma Qesra Rûmîne de derheqê Peymana Lozanî de çar panelî kerdî. Panelan de dejê ke Peymana Lozanî Kurdîstan de bîyê sebebê ci ameyî ercnayene. Tarîxnas û sîyasetmedarê kurdî û ewropayîjî tewrê nê panelan bîyî. Reyna ma pêramotişê resiman zî akerd ke qala 100 serranê kurdan kerdêne. 22yê temmuze de reyna Lozan de nawnayîşêko pîl do bêro kerdene. Rayraşîyayîş do qeraxê Gola Lemane ra dest pêbikero û verê Qesra Rûmîne de mîtîngêk do bêro kerdene.  22-23yê temmuze de salona Şaredarîya Lozanî de bi beşdarîya 500 kesan Konferanso Neteweyî yê Kurdîstanî di rojan do bêro kerdene. Netîcenameyê ci zî 24ê temmuze de do bêro eşkerakerdene.''

Koçî venga pêro kurdîstanijan da ke wa tewrê çalakî û aktîvîteyanê serê Peymana Lozanî bibê û vat: ''Ganî kurdî hînî wayîrê statuyêkî bibê. Ma yewîya kurdan ser o xebitîyenê. Ganî qet yew hêz verê yewîya kurdan nêgêro. Coka ma reyna venga PDKyî danê. Wa her kes bi coşî tewrê bernameyanê ma bibo, tewirêkê yewîya neteweyîye bimojno û menfaetanê kurdan bipawo.''

Do dewam bikero...