Bi wesîleya serra 12. ya Nobeta Azadîye bi beşdarîya endamanê Parlamentoyê Ewropa Alfonsi û MacManusî kombîyayîşêkê çapemenîye ame kerdene û seba pîlkerdişê kampanyaya 'Abdullah Ocalanî rê Azadîye' veng dîya.
Nobeta 'Rayberê Şarê Kurdî Abdullah Ocalanî rê Azadîye' ya ke şaristanê Strasbourgî yê Fransa de yena kerdene, hewteyê 573. de ya. Nobetdarê nê hewteyî endamê Komîsyonê Têkilîyanê Teberî yê KNKyî Ahmet Yaman, Emre Kara û Niştiman Erdede yê.
Wekîlê Partîya Keske François Alfonsi, Wekîlê Partîya Çepe MacManus, akademîsyen Louis Lemko û Endamê Konseya Rayberdişî ya KCKyî Zubeyîr Aydarî bi wesîleya serra 12. ya Nobeta Azadîye kombîyayîşêkê çapemenîye kerd.
MacManusî kombîyayîş de ard ziwan ke seba çareserkerdişê şerî herême de Abdullah Ocalan mefteyêk o û vat: ''Ma meseleya kurdan zanenê û seba çareserkerdişê na mesele tim paştî danê kurdan.''
Akademîsyen Lemkowî pare kerd ke ê paştî danê çalakîya verê Ewropa û tepişteyanê kurdan. Lemkowî îfade kerd ke ganî Tirkîya cade Abdullah Ocalanî vera bida.
Alfonsiyî zî kombîyayîşê çapemenîye de qisey kerd û da zanayene ke Tirkîya de heqê merdiman çin ê, dezgehê Ewropa zî wina vanê.
Endamê Konseya Rayberdişî ya KCKyî Zubeyîr Aydarî vist vîrî ke bi serran o Nobeta Azadîye dewam kena û beşdaranê nobete rê sipas kerd. Aydarî vist vîrî ke Rayberê Şarê Kurdî ra 27 hewte yo agahîyêke nêna girewtene û vat: ''Serek Apo erjê şarî yo. O teyna rayberê partîyêke ney rayberê merdimatîye yo. Ganî ma kampanyaya seba azadîya Rayberîye pîlêr bikerê. Wayîrvejîyayîşê Rayber Apoyî erkêko exlaqî, sîyasî û merdimatî yo.''
