Serrgêra 19. ya ronîyayîşê Partîya Yewîya Demokratîke (PYD) paytextê Almanya Berlin de ameye fîrazkerdene. Deqayêkê rêzgirewtişî ra dima Hemserekê PYDyî Salih Muslimî bi rayîrê Skype mesajê xo da. Şayîye de Silava Rojava, Rezgar Oskan, Şerîf Omerî, Hozan Aydin û Dilo Doxan vejîyayî sehne ser û hunerê xo pêşkêş kerd.

Hemserekê FED-KURDî Kerem Gokî şayîye de qisey kerd û bale ante têkilîya mabênê Şorişê Rojawanî û ronîyayîşê PYDyî ser. 

Salih Muslimî zî serrgêra ronîyayîşê PYDyî fîraz kerde û tecrîdê vera Rayberê Şarê Kurdî Abdullah Ocalanî vist vîrî. Muslimî vat: ''No seba ma şerm o. Rayberê ma bi serran o hucreyê yewkesî de tepişîyeno û tira agahîye nêna girewtene. Ganî tecrîd bêro şiknayene.''

Şayîye bi govendan qedîyaye.