Rayraşîyayîşo Dergo ke hetê ciwananê kurdan û enternasyonalîstan ra 11ê êlule bi şîarê "Ji bo Azadiya Rêber Apo Werin Cenga Azadiyê" Almanya de ame kerdene roja 6. de bajarê Aachenî de qedîya.

Ciwanê ke 11ê êlule ra nata rayra şinê merkezê trenan ê Aachenî de mîtîngêk viraşt. Welatanê cîya cîyayan  ra 50 enternasyonalîstî tewrê rayraşîyayîşî bîyî. Ciwanan eşkerayîye daye û vat rixmê heme provokasyonan înan waştişê çalakîya xo ard ca. Mîtîng de sloganê sey  “Bijî berxwedana gerîla”, “Bijî Rêber Apo”  ameyî eştene.

Bi nameyê ciwananê kurdan Çekdar Serhatî qisey kerd. Serhatî vat: ‘’Ma semedê azadîya Rayber Apoyî û selamkerdişê têkoşînê gerîlayan no rayraşîyayîş kerd. Rayraşîyayîşê ma ewro tîya de qedîyeno la rayraşîyayîşê ma yê azadîye do dewam bikero. Ma sey ciwananê nê welatî zanê ke azadîya welat û şarê ma pê azadîya Rayber Apoyî mumkun a. Rayber Apoyî mîsyonê serkêşîye dayo ma û ma zî do berpirsîyarîya xo bîyarê ca û her cayê Kurdîstan û Ewropa de têkoşînê xo pîlêr bikerê. Ma hêzê xo gerîlayanê xo yê qehremanan ê ke koyanê Kurdîstanî de xover danê, înan ra gene.’’

Eşkerayîyê ke bi ziwananê cîya cîyayan ameye dayene de zî provokasyonê ke semedê vergirewtişê rayraşîyayîşî ameyî kerdene ameyî şermezarkerdene û nê ameyî vatene: ‘’Paradîgmaya Rayber Apoyî hêvîya dinyaya newî ya. Coka ganî Rayber Apoyo ke na hêvî afernaya serbest bêro veradayene. Ma do semedê na hêvîya newî têkoşîn bikerê û na paradigma vila bikerê.’’

Ciwanî do ewro tewrê Festîvala Kulturê Kurdan a Mîyanneteweyîye ya ke Hollanda de do bêro kerdene, bibê.