Strasbourg: Çalakîya vera îşxal û tecrîdî roja dîyine de ya

Strasbourg de semedê protestokerdişê tecrîdê serê Rayberê Şarê Kurdî Abdullah Ocalanî û hêrişê îşxalî yê vera Herêmanê Pawitişî yê Medya çalakîya roniştişî ya ke vizêr dest pêkerde dewam kena.

TJK-E û KCDK-E bajarê Strasbourgî yê Fransa de bi şîarê ''vara îşxal û qirkerdişî her ca Avaşîn, Zap û Metîna yê. Dem demê azadîye yo!'' çalakîya roniştişî ya seba çar hewteyan  a ke 12ê gulane dest pêkerde roja dîyine de ya.

Ewro grûbanê çepan çalakwanî zîyaret kerdî. Aktîvîstanê Yaşanacak Dunya ard ziwan ke hêrişê îşxalî vera Herêmanê Pawitişê Medya têna hêrişê vera azadîya şarê kurdî nîyê, nê hêrişî semedê çînkerdişê şarêkî yenê kerdene. Aktîvîstan veng da heme merdimîye ke wa vera hêrişê ke pê destê welatanê nîjadperestan, dewleta tirke û PDKyî yênê  kerdene wayîrê şarê kurdî vejîyê û vat wextê ci yo ke wa her ca bibo sey Avaşîn, Zap û Metîna.