Nobeta ‘Ocalanî rê azadîye’ ya ke seba azadîya Rayberê Şarê Kurdî Abdullah Ocalanî verê awanîya Konseya Ewropa ya bajarê Strasbourgî yê Fransa de yena girewtene kewte serra heştine. Çarçewaya serrgêra nobete de vizêr Strasbourg de çalakîyê kulturkîyî ameyî viraştene.

 Çalakî Place Kleberî ya merkezê Strasbourgî de amî viraştene û hunermende Yelda Ebbasî, Hozan Comert, Xelîl Xemgîn û Serhat Çarnewa, heman wextî de grûbêka govende ya Parîsî tewrê çalakîye bîyî û hunerê xo pêşkêş kerdî.

 Çalakîye de bi seyan Kurdistanij û Fransayijî amade bîyî û pankarta ke ser o “Seba azadîya Rayberê Şarê Kurdî Abdullah Ocalanî hewt serrî yo ma nobete gênê” amîbî nûştene amî akerdene.

 Temsîlkarê sazîyan ê ke mîyanê hewteyî de nobedar bîyî zî tewrê çalakîye bîyî. Hemsereka Kongreya Cimatê Demokratîkî yê Kurdistanî yê Ewropa (KCDK-E) Fatoş Goksûngûre çalakîye de qisey kerd û vat ke ê do fek azadîya Ocalanî ra vera nêdê. Goksûngûre ard ziwan ke çalakîye nobete do heta azadîya Ocalanî dewam bikero.

 Goksûngûre bale ante sere hêrişanê îşxalî yê dewleta Tirkî yê Başûrê Kurdistanî, qirkerdişê Kortekî ard vîrî û veng da welatanê Ewropa û hemeyê dinya ke hemverê nê qirkerdişan bêveng nêmanê.

 Dima ra Hozan Comert, Yelda Ebbasî, Xelîl Xemgîn û Serhar Çarnewa vejîyayî sehne. Grûba govende ya Merkezê Cimatê Demokratîkî yê Kurdan ê Parîsî hunerê xo pêşkêş kerd.