Dîwanê Hemserekîya KCDK-E bi eşkerayîyêke da zanayene ke seba seba azadîya Rayberê Şarê Kurdî Abdullah Ocalanî çalakîya roniştişî ya 4 rojan do dest pêbikera. 

KCDK-E ard ziwan ke sey dewleta tirke û îqtîdarê faşîstî AKP-MHP hêzê mîyanneteweyî, CPT, Konseya Ewropa zî tecrîdê Îmraliyî ra berpirsîyar ê. KCDK-E vist vîrî ke CPTyî raporê xo yê tebaxa 2020î de eşkera kerd ke sîstemê Îmraliyî sîstemê tecrîdî yo û nêno qebulkerdene. KCDK-E bale ante ser ke azadîya Ocalanî têna seba kurdan nê seba pêro şaran girîng a. 

KCDK-E pare kerd ke çalakîya roniştişî ya 4 rojan 12ê teşrîna verêne de şaristanê Strasbourgî yê Fransa de do dest pêbikera. Goreyê eşkerayîya dezgehî çalakîye dore bi dore biba û her roje komêka 30 kesan do çalakîye bîyara ca.

-Mabênê 12-16ê teşrîna verêne de temsîlkarê dezgehanê kurdîstanij û tirkîyayîjan, sîyasetmedarî, temsîlkarê bawerî û nasnameyan do çalakîye bîyarê ca.

-Mabênê 19-23ê teşrîna verêne de temsîlkarê dezgehanê cinîyan do çalakîye bikerê.

-Mabênê 26-31ê teşrîna verêne de temsîlkarê dezgehanê ciwanan do çalakîya roniştişî bidê dewamkerdene.

-28-29-30ê teşrîna verêne de zî enternasyonalîstî do çalakîye de amade bibê.

Ame parekerdene ke verê Konseya Ewropa ya Strasburgî de adresê Conseil de l'Europe, 1 avenue de l'Europe, 67000 Strasbourg de eşkerayîya çapemenîye do bêra dayene û 'Çalakîya Roniştişî ya Seba Azadîya Ocalanî' saete 12:00 de do dest pêbikera.

KCDK-E venga her kesî da ke wa tewrê çalakîye bibo.