Bi hemkarîya Merkezê Cigêrayîşî yê SAGE yê Zanîngehê Strasbourgî û École des Hautes Études en Sciences Sociales (EHESS) komxebata ‘’Şaredarîyanê Kurdan de Vînayîşanê Neweyan û Newebîyayîşanê Demokratîkan’’ ameye kerdene.

Hemşaredarê kurdî yê verênî, cigêrayoxî û endamê şaredarîyan zî tede xeylê kesî tewrê komxebate bîyî.

EHESSî ra Michel Agierî plansazîya şaristanî ser o qisey kerd. Zanîngehê Strasbourgî ra Wiebke Keimî derheqê tecrubeyê kulturel û sîyasîyî yê kurdan de qisey kerd û vat ke kurdî vera polîtîkayanê asîmîlasyon û îmha yê Tirkîya estbîyayîşê xo pawenê.

Akademîsyen Hamît Bozarslanî vist vîrî ke dewleta tirke wexto ke demokrasî û huqûqî nêana ca kurdî bi pratîkanê xo yê demokrasîyê herêmîyî wazenê bibê wayîrê destkewteyan. Bozarslanî dîyar kerd ke îdareyê herêmî vîrameyîşê kesayetanê sey Şêx Seîd, Seyîd Riza û Ehmedê Xanî pawenê.

Hemşaredarê Amedî yê verênî Osman Baydemîrî qalê ci kerd ke dewlete seba astengkerdişê kurdayetîye û îdareyanê kurdan rejîmê qeyûman vist dewre.

Roniştişê diyînî de Hemşaredara Cizîre ya verêne Leyla Îmret pare kerd ke bi modelê hemşaredarîye înan kerd ke şar raşta raşte tewrê îdareyî bibo.

Hemşaredara Wanî ya verêne Bedîa Ozgokçe ard ziwan ke polîtîkayê qeyûman vera şarî darde bîyî û qeyûman çimeyê şarî talan kerdê.

Hemşaredarê Sûrî yê verênî Abdullah Demîrbaşî zî derheqê modelê înan ê 2004-2014î de agahîyî dayî.

Komxebate bi pêşnîyazanê çareserîye qedîyaye.