Şaristanê Stuttgartî yê Almanya de bi beşdarîya xeylêk temsîlkaranê dezgehan û bi hezaran kesan Merkezê Komelê Demokratîkî yê Kurdan  (NCDK) o newe ame akerdene.

Wextê akerdişî de sloganê sey “Şehîd namirin”, “Bijî Serok Apo” û “Jin, Jiyan, Azadî” ameyî vatene. 

Hemserekanê NCDKyî Mesut Daghan û Pervîne Şen akerdiş de ard ziwan ke ê do merkezê neweyî de xebatanê hîna xurtan bikerê.

Hemsereka KCDK-E Zubeyde Zumrut akerdiş de bale ante hêrişanê dewleta tirke û îxanetê PDKyî ser. Zumrute vat ke kurdî do vera hêrişan apey gamêke nêerzê.

Hemsereka KON-MEDî Rûkene Akça û sîyasetmedare Nursele Aydogan zî îfade kerd ke vera hêrişanê serê Kurdîstanî têkoşîn ganî her ca de bêro pîlkerdene.

Vervatoxê HDPyî yê Almanya Faysal Sariyildizî da zanayene ke kurdîstanijanê Stuttgartî tim pê çalakîyanê xo morê xo dayo binê tarîxî.

Akerdiş de hunermendî Hozan Alî Baran, Hozan Sîmar, Hozan Bermal Çem, Hozan Zeynep Enhas, Sedat û Bawer, Garîp Nurhak Rever Davran û Koroya Zarokan vejîyayî sehne ser. Akerdiş pê govendan qedîya.