Seba ke Parlamentoyê Federalî yê Swîsre vera Erdoganî ambargo bikero kampanyaya îmzayan dîyaye destpêkerdene. Campax, Komelê Demokratîkî yê Kurdan ê Swîsre (CDK-S), Sosyalîstê Ciwanî yê Swîsre (JUSO) û Endamê Konseya Neteweyî ya Swîsre Fabian Moliina tewrê îtîfaqê kampanya bîyî.

Eşkerayîya kampanya de ame vatene ke hêrişê Erdoganî û hêzê ci yê vera Rojawanî dewam kenê û nê hêrişan de sûcî yenê kerdene. Çarçewa kampanya de ame waştene ke ambargoyo ke vera Putimî yeno kerdene wa vera Erdoganî zî bêro kerdene.

Fabian Molina bi heman waştişî vernîyazêk pêşkêşê Parlamentoyê Swîsre zî kerd.

Vernîyazê Molinayî:

Temsîlkara Têkilîyanê Karanê Teberî yê CDK-Syî Asmîne Engîn ard ziwan ke Erdogan pê hêrişan qanûnanê mîyanneteweyîyan binpay keno û vat: ''Ganî Konseya Federale ya Swîsre vera Erdoganî pê ambargoyî tewirê xo bimojna.''

Sekretera Mîyanneteweyîye ya JUSOyî Mia Jenni vat: ''Ma kurdan rê destekê xo mojnenê. Ganî binpaykerdişê Tirkîya bêrê şermezarkerdene. Ganî vera Erdoganî ambargo bêro caardene.''

Campaxî ra Virginia Kopfli zî venga Wezîrê Karanê Teberî Cassisî da ke wa cade seba ambargoyê vera Erdoganî têbigêro û paştgîranê Erdoganî ceza bikero.