Kongreya Awankerdişê Dêrsimî Terteleya Dêrsimî ser o Partîya Sosyalîste ya Swîsre (SP) de kombîyayîş kerd. Londonê Brîtanya de zî qurbanê Terteleyê Dêrsimî ameyî yadkerdene.

Şaristanê Bernî yê Swîsre de nameyê Kongreya Awankerdişê Dêrsimî ser o Demîr Çelîk, Huseyîn Berkan Alpar û Songule Çelîk hetê Serekê Komîsyonê Karanê Teberî yê SPyî Jon Pult î Wekîl Mustafa Aticiyî ra ameyî pêşwazîkerdene. Heyetî derheqê Terteleyê Dêrsimî de dosyayêke daye heyetê SPyî. Kombîyayîş de ame vatene ke seba ke qirkerdişê neweyî nêrê kerdene weçînayîşê 14ê gulane zaf girîng ê. Kombîyayîş de ame waştene ke heyetêk seba ke teqîbê weçînayîşanê Tirkîya bêro erşawitene.

Komeleya Kulturî ya Dêrsimijan a Londonî (Dêrsim-Der) bi wesîleya serrgêra 86. ya Terteleyê Dêrsimî Merkezê aktîvîteyêka yadkerdişî kerde. Sîyasetmedar Osman Baydemîr, temsîlkarê rêxistinanê komelê sivîlî û xeylêk kesî tewrê aktîvîte bîyî. Aktîvîte de Dayîke Yadîgare seba qurbanan çirayî vistî ta. Nameyê Dêrsim-Derî ser o Kudrete Erden qisey kerd û vat: ''Seyîd Riza û embazanê ci qetî sereyê xo nêard war.''

Dima derheqê Terteleyê Dêrsimî de sînevîzyonêk ame mojnayene.

Dima sîyasetmedarê kurdî Osman Baydemîrî qisey kerd û vat ke qirkerdişê Efrîn, Şingal, Roboskî û Madimakî dewamê Terteleyê Dêrsimî bîyê. Baydemîrî îfade kerd ke ferasetê Terteleyê Dêrsimî bodrumanê Cizîre de xo mojnabi ra û vat: ''14ê gulane de ma hesabê nê weçînayîşan bipersê. Serê sindoqan de ma na dîktatorîye bişawê.''