Maçê lîgê konferansî yê UEFA de tîma Fiorentina ya Îtalya tîma Medîpol Başakşehîrî bi skorê 2-1 bin kerde. Tîma Medîpol Başakşehîrî ya ke keyeyê Erdoganî serê ci ra pereyê reşî keno pakî Floransa de raştê nêrazîbîyayîşan ameye.

Kurdan û komanê çepgîran qebul nêkerd ke na tîme şaristanê şerwanê YPGyî yê şehîdî Lorenzo Orsettî (Têkoşer Piling) de bêra pêşwazîkerdene. Coka eşkerayîyêke ameye dayene. Karîkaturîstanê namdaran ê Îtalya ra Zerocalcare, babîyê Orsettîyî Alkesandro Orsetti, endamê Komîteya Kurdan a Îtalya, endamê Meclîsê Şaredarîya Floransa, têgêrayîşê wendekar û rêxistinê çepgîrî zî tewrê eşkerayîye bîyî.

Niccolo Bartoloniyî eşkerayîye de qisey kerd û vat ke Erdogan mesuldarê qirkerdişan o. Bartoliniyî vat: ''Ma do trîbunan de AKP û keyeyê Erdoganî aciz bikerê.''

Rêxistinanê çepgîran û terefgîranê futbolî zî nêmeyê şewe de afîş û vilawekî  Stadio Artemio Franchi de daliqnayî.