Bi wesîleya serrgêra Komployê Mîyanneteweyî yê vera Rayberê Şarê Kurdî Abdullah Ocalanî sey her serre, emser zî do rayraşîyayîşo derg bêro kerdene. Enternasyonalîstê ke emser do 6ê sibate de Cenevre ra dest pê rayraşîyayîşî bikerê, 4 sibate de do Cenevre de bêrê têhet û 5 sibate de badê semînerî do eşkerayîya çapemenîye bidê.

Rayraşîyayîş do 6ê sibate de meydanê Neuve yê Cenevre de saete 9.30  bêro destpêkerdene. Enternasyonalîstî do 7ê sibate de Lozan, 8ê sibate de Bern, 9ê sibate de Solothurn û 10ê sibate Basel de rayra şirê û etabê Swîsre temam bikerê. 11ê sibate de Strasbourg de do pê rayraşîyayîş û mîtîngî çalakîye biqedîyo.

Aktîvîsto kolombîyayij Camilo Torresê ke bi nameyê Komîteya Amadekerdişî ya Rayraşîyayîşî ANFyî rê qiseyî kerd, bale ante tecrîdê serê Rayberê Şarê Kurdî Abdullah Ocalanî ser ke bi serran o dewam keno û vat ê wazenê pê nê rayraşîyayîşî tecrîdî bişikinê. Torresî wina qisey kerd: ''22 aşmî yo Rayberîye ra xeberêke nîna girewtene. No têna problemê şarê kurdî û şaranê herême nîyo, problemê heme dormeyê azadîwaştoxan o. CPT rolê xo kay nêkeno û beno sebebê xurtkerdişê tecrîdî. Aye ro ma wazenê pê nê rayraşîyayîşî veng vejê. Ma wazenê ke heme dezgehanê sey heqanê merdiman rê vengê xo bidê eşnawitene. Wa vera tecrîdê serê Rayberê Şaran bêveng memanê.''

Camilo Torresî vat: ''Ma wazenê ke heme renganê dinya tewrê nê rayraşîyayîşî bikerê û tecrîdê serê Rayberîye bişikinê. 11ê sibate de bajarê Strasbourgî yê Fransa de hetê ciwananê kurdan ra do çalakîye bêro kerdene. Ma do tewrê na çalakîye zî bibê. Ma sey enternasyonalîstanê ke modernîteya demokratîke rê bawer kenê û azadîya Rayberê Şarê Kurdî wazenê, ma do 4ê sibatê de bêrê têhet. Ma wazenê tecrîdê 24 serran bişikinê û vera hêzanê hegemonîkan ke komplo de ca girewt, mesajêk bidê ke wa bireso cayê xo.  Inkey  hêzê demokratîkî yê mîyanneteweyî semedê Rayberîye hêdî hêdî yenê têhet. Ma zî pê rayraşîyayîşî wazenê têkoşînê xo xurtêr bikerê û bi azadîya fîzîkîye ya Rayberîye tacîdar bikerê.  Ez tîya ra venga heme rayapêroyîya demokratîke dana. Paştî bidê nê rayraşîyayîşî ke ma vengê xo dahîna zaf bidê eşnawitene.